Fana: At a Speed of Life!

የኢትዮ-ጂቡቲ 2ኛ ሰርኪዩት የኃይል ትስስር መስመር ፕሮጀክት ግንባታ ተጀመረ

አዲስ አበባ፣ ጥቅምት 11፣ 2015 (ኤፍ ቢ ሲ) የኢትዮ- ጂቡቲ ባለ 230 ኪሎ ቮልት ሁለተኛ ሰርኪዩት ከፍተኛ የኃይል ማስተላለፊያ መስመር እና የማከፋፈያ ጣቢያ ግንባታ ፕሮጀክት በይፋ ተጀምሯል፡፡

የኢትዮጵያ ኤሌክትሪክ ኃይል ዋና ሥራ አስፈጻሚ አሸብር ባልቻ በማስጀመሪያ መርሐ ግብሩ ላይ እንደገለጹት ÷ ፕሮጀክቱ ለኢትዮጵያ ተጨማሪ የውጭ ምንዛሪ ማስገኛ ለጂቡቲ ደግሞ በተመጣጣኝ ዋጋ ኤሌክትሪክ በማግኘት የሀገሪቱን ኢንዱስትሪ ለማነቃቃት እና የኤሌክትሪክ ተደራሽነትን ለማስፋፋት ጉልህ ሚና ይኖረዋል፡፡

በተጨማሪም ቀጣናዊው የኃይል ትስስሩን የሚያሳልጥ እና ሀገራቱ በኤሌክትሪክ እና በትራንስፖርት የጀመሩትን ትስስር የበለጠ ለማጠናከር አስተዋጽኦ አለው ማለታቸውን የኤሌክትሪክ ኃይል መረጃ ያመላክታል፡፡

የጂቡቲ ኤሌክትሪክ ተቋም ምክትል ዋና ዳይሬክተር አቡበከር ሀሰን በበኩላቸው ÷ ሁለተኛው የኃይል ማስተላለፊያ መስመር ግንባታ ፕሮጀክት ለጂቡቲ ከፍተኛ ጠቀሜታ ያለው መሆኑን ተናግረዋል፡፡

በተለይም በተመጣጠነ ዋጋ ለህብረሰተባቸው ያልተቆራረጠ ኃይል ተደራሽ በማድረግ በሀገራቸው ያለውን የኃይል አቅርቦት እጥረት ለመቅረፍ ከፍተኛ ጠቀሜታ እንዳለው ነው የገለጹት፡፡

በኢትዮጵያ ኤሌክትሪክ ኃይል የፕሮጀክቱ ሥራ አስኪያጅ አብነት አሕመድ በበኩላቸው ÷ ከድሬ ዳዋ ተነስቶ ወደጂቡቲ የተዘረጋው መስመር ከ10 ዓመታት በላይ በማገልገሉ ከጊዜ ወደ ጊዜ ጫና እየደረሰበት በሚፈለገው መጠን ኃይል ለማቅረብ አስቸጋሪ እየሆነ በመምጣቱ ሁለተኛውን ሰርኪዩት መገንባት አስፈልጓል ብለዋል፡፡

ፕሮጀክቱ በኮምቦልቻ 2 እና በሠመራ ማከፋፈያ ጣቢያዎች የማስፋፊያ ግንባታ የሚኖረው ሲሆን÷ በሚሌ ከተማ ደግሞ አንድ ባለ 230 ኪሎ ቮልት አዲስ ማከፋፈያ ግንባታ ሥራ እንደሚኖረው ገልጸዋል፡፡

በተጨማሪም ከኮምቦልቻ 2 እስከ ሠመራ ድረስ ያለውን ነባሩን 170 ኪሎ ሜትር የባለ 230 ኪሎ ቮልት መስመር የማጠናከር፣ ከሠመራ እስከ ጂቡቲ ድንበር ደግሞ የ290 ኪሜ ርዝመት ያለው አዲስ የባለ 230 ኪሎ ቮልት የመስመር ዝርጋታ ሥራዎች ይሠራሉ፡፡
240 ሜጋ ዋት የኤሌክትሪክ ኃይል የማስተላለፍ አቅም የሚኖረውን ፕሮጀክት የሁለቱ ሀገራት መንግሥታት በድንበሮቻቸው ውስጥ እንደሚገነቡት ተገልጿል፡፡

በኢትዮጵያ በኩል የሚከናወነው ግንባታ ከአፍሪካ ልማት ባንክ በተገኘ 71 ሚሊየን የአሜሪካ ዶላር ብድር የሚሸፈን መሆኑንም ተመላክቷል፡፡

ወቅታዊ፣ትኩስ እና የተሟሉ መረጃዎችን ለማግኘት፡-
ድረ ገጽ፦ https://www.fanabc.com/
ፌስቡክ፡- https://www.facebook.com/fanabroadcasting
ዩትዩብ፦ https://www.youtube.com/c/fanabroadcastingcorporate/
ቴሌግራም፦ https://t.me/fanatelevision
ትዊተር፦ https://twitter.com/fanatelevision በመወዳጀት ይከታተሉን፡፡

ዘወትር፦ ከእኛ ጋር ስላሉ እናመሰግናለን!

You might also like

Leave A Reply

Your email address will not be published.