ኢትዮጵያ መጎብኘት ካለባቸው 5 ምርጥ የዓለማችን የቱሪዝም መዳረሻዎች መካከል አንዷነች – ናሽናል ጂኦግራፊ

አዲስ አበባ፣ ጥር 2፣ 2015 (ኤፍ ቢ ሲ) ናሽናል ጂኦግራፊ መጎብኘት አለባቸው ካላቸው የዓለማችን አምሥት ምርጥ የቱሪዝም መዳረሻዎች መካከል ኢትዮጵያን አካቷል፡፡

ናሽናል ጂኦግራፊ – ብሪታኒያ የፈረንጆቹን 2023 ዐዲስ ዓመት ዕትምን ይዞ ወጥቷል፡፡

በሰሜን ኢትዮጵያ አፋር ውስጥ ዳሎልን አካሎ የሚገኘው የደናክል አካባቢ በቀዳሚነት የቱሪስቶችን ቀልብ ይገዛል ተብሎ በዲጂታል ዕትሙ ተጠቁሟል፡፡

የደናክል አካባቢ የምድራችን ደረቁ ፣ እጅግ ሞቃታማው እና ረባዳማው አካባቢ እንደመሆኑ ፈተና እና ጀብዱ የሚወዱ ቱሪስቶች ሳይጎበኙት እንዳያልፉም በመረጃው አስታውሷል፡፡

አካባቢው በውስጡ ጨዋማ ወንዞችን ፣ ቢጫ ቀለም ያላቸው አሲዳማ እና እንፋሎታማ ምንጮችን እንደ ጅረት የሚፈሱ እሳተ-ገሞራዎችን እንደያዘም ጠቅሷል፡፡

ናሽናል ጂኦግራፊ -ብሪታኒያ በተለይ በጎንደር እና በላሊበላ አካባቢ በኦርቶዶክስ አማኞቸ ዘንድ በደመቀ ሥነ-ሥርዓት የሚከበሩት የጥምቀት እና የገና በዓላት ምርጥ የቱሪስት መስኅቦች መሆናቸውን አንስቷል፡፡

በ17ኛው ክፍለ-ዘመን እንደተገነባ የሚነገርለት የጎንደር ቤተ መንግስ እንዲሁም የላሊበላ ውቅር አቢያተ-ክርስቲያናትም መጎብኘት አለባቸው ብሏል-መረጃው፡፡

በተጨማሪም በተጠቀሱት አካባቢዎች የሚደረጉት ሃይማኖታዊ ጉዞዎች ምግቦች ፣ መጠጦች እና ባሕላዊ ጭፈራዎች ሌላ የቱሪስቶችን ዕይታ የሚስቡ ትዕይንቶች መሆናቸውንም ዘርዝሯል፡፡

ቱሪስቶች የአስደናቂ መልክዓ-ምድሮች እና የበርካታ ጎሳዎች መገኛ የሆነውን እስከ ኦሞ ሸለቆ የሚዘልቀው ደቡባዊ ክፍል ያለውን አካባቢ እንዲጎበኙም ተጠቁሟል፡፡

ወቅታዊ፣ትኩስ እና የተሟሉ መረጃዎችን ለማግኘት፡-