Fana: At a Speed of Life!

ፋና ብሮድካስቲንግ ኮርፖሬት ለሦሥት ዓመታት ባስተላለፈው የሬዲዮ ድራማ ተመሠገነ

አዲስ አበባ፣ ጥር 17፣ 2015 (ኤፍ ቢ ሲ) ፋና ብሮድካስቲንግ ኮርፖሬት ለሦሥት ዓመታት ባስተላለፈው የሬድዮ ድራማ ተመሠገነ።

በኢትዮጵያ ለ20 ዓመታት ያህል በጎጂ ባሕላዊ ድርጊቶች ፣ በሱስ ማቆም እና በቤተሰብ ምጣኔ ላይ ግንዛቤዎችን በመስጠት በተለያዩ የሥነ ሕዝብ እንቅስቃሴዎቹ የሚታወቀው “ፖፕሌሽን ሚዲያ ሴንተር ኢትዮጵያ” የንቃቃት ሬዲዮ ድራማ መጠናቀቁን ገልጿል።

የሬዲዮ ድራማው ይዘት በዋናነት ፆታዊ ጥቃቶች እንዲቆሙ ፣ ያለ ዕድሜ ጋብቻ እንዲቀር እንዲሁም የቤተሰብ ምጣኔ እንዲኖር ኪነ-ጥበባዊ በሆነ መንገድ ለአድማጮቹ መልዕክት ማስተላለፍ ነበር።

በተለያዩ የኪነጥበብ ተዋንያን ሲቀርብ በነበረው የሬዲዮ ድራማ ሕብረተሰቡ ግንዛቤ ማግኘቱን እና ለውጥም እንዳሳየ በኢትዮጵያ “የፖፕሌሽን ሚዲያ ሴንተር” ተወካይ ዶክተር ኃይለኛው እሸቴ ተናግረዋል።

በሥራው የተሳተፉ አካላትን በሙሉ ሲያመሰግኑም ÷ ፋና ብሮድካስቲንግ ኮርፖሬት ላደረገው አስተዋፅዖ ምሥጋናቸውን ችረዋል።

ተቋሙ ከዚህ ቀደም በብዙዎች ዘንድ በሚታወቀው “የቀን ቅኝት የሬዲዮ ድራማ” ሲታወስ ሌሎች ተከታታይ አዝናኝ እና አስተማሪ ድራማዎችንም በመስራት እና ዓየር ላይ በማዋል ይታወቃል።

በምሥጋና መድረኩ ጎጂ ልማዳዊ ድርጊቶች እንዲቆሙ ተመሳሳይ ሥራዎች ከኮርፖሬቱ ጋር መሥራት እንደሚቀጥሉ “ፖፕሌሽን ሚዲያ ሴንተር ኢትዮጵያ” አስታውቋል፡፡

ከሬዲዮ ድራማው መጠናቀቅ በተጨማሪም በተለያዩ ፀሐፊያን የተደረሱ ሁለት መጽሐፍት በዛሬው ዕለት ተመርቀዋል።

“ንቃቃት የሬዲዮ ድራማ” በ156 ክፍሎች ለሦስት ዓመታት ያህል በፋና ብሮድካስቲንግ ኮርፖሬት በሰባት የሥርጭት ጣቢያዎች ሲተላለፍ ነበር።

በፍቅረሚካኤል ዘየደ

ወቅታዊ፣ትኩስ እና የተሟሉ መረጃዎችን ለማግኘት፡-
ድረ ገጽ፦ https://www.fanabc.com/
ቴሌግራም፦ https://t.me/fanatelevision
ትዊተር፦ https://twitter.com/fanatelevision በመወዳጀት ይከታተሉን፡፡
ዘወትር፦ ከእኛ ጋር ስላሉ እናመሰግናለን!
You might also like

Leave A Reply

Your email address will not be published.