Fana: At a Speed of Life!

በኢትዮጵያ ልምዳቸውን ሲያካፍሉ የነበሩ የቻይና የህክምና ባለሙያዎችን ቆይታቸውን አጠናቀቁ

አዲስ አበባ፣ ሚያዚያ 21፣ 2012 (ኤፍ.ቢ.ሲ) ባለፉት ሁለት ሳምንታት ለኢትዮያውያን የጤና ባለሙያዎች ልምዳቸውን ሲያካፍሉ የነበሩ የቻይና የህክምና ባለሙያዎችን ቆይታቸውን አጠናቀቁ።

በሳንባ፣ በጽኑ ህሙማን፣ በውስጥ ደዌ እና በተለይም የማህበረሰብ ጤና ላይ ስፔሻላይዝ ያደረጉት የህክምና ባለሙያዎቹ በኢትዮጵያ ቆይታቸው ለይቶ ማከሚያዎችን ተዘዋውረው በማየት ለባለሙያዎች ልምድ አካፍለዋል።

በተጨማሪም ለኢትዮጵያውን የህክምና ባለመያዎች በቪዲዮ ኮንፈረንስ የሁለት ቀናት ትምህርት ሰጥተዋል።

የጤና ጥበቃ ሚኒስትርዶ/ር ሊያ ታደሰ የህክምና ቡድኑ ÷በቻይና ከፊት ሆነው ወረርሽኙን ለመከላከል በተለያየ መንገድ አስተዋጽኦ ሲያደርጉ የቆዩ የህክምና ባለሙያዎቹ ለኢትዮጵያውያን የህክምና ባለሙያዎች በቻይና የነበረውን ኮቪድ 19ን የመከላከል ልምድ ላለፉት ሁለት ሳምንታት በተለያየ መንገድ ሲያካፍሉ መቆየታቸውን ገልጸው ለቻይና መንግስት እና ለህክምና ባለሙያዎቹ ምስጋናቸውን አቅርበዋል።

በኢትዮጵያ የቻይናው አምባሳደር ሚስተር ታን ዢያን በበኩላቸው ቻይናውያን የህክምና ባለሙያዎች በየጊዜው የደረሱበትን ግኝት፣ የክትትል መንገድና ተያያዥ ሙያዊ ልምዶችን ለኢትዮጵያውያን አቻቸው ሲያካፍሉ መቆየታቸውን ተናግረዋል።

ቻይና ከኢትዮጵያ ጋር ያላትን ግንኙነት ፍሬያማነት የሚያሳይ ቆይታ እንደነበራቸው እምነታቸውን ገልፀዋል።

ህብረት ይህን ወረርሽኝ ለማሸነፍ ዋነኛው ሀይል ነውና ህብረታችን ይቀጥላል ብለዋል አምባሳደሩ።

በአክሱማዊት ገ/ህይወት

You might also like

Leave A Reply

Your email address will not be published.