የውጭ አገራት የጉዞ ታሪክ ሳይኖራቸው የኮሮናቫይረስ የሚገኝባቸው ሰዎች ቁጥር እየጨመረ መሆኑ ተጠቆመ

ኅብረተሰቡ በኢትዮጵያ የኮሮናቫይረስ የተገኘባቸው ሰዎች ቁጥር “አነስተኛ ነው” በማለት እየተዘናጋ ነው ብለዋል።

በጎረቤት አገራት በኮሮናቫይረስ የተያዙ ሰዎች ቁጥር እያሻቀበ መሆኑንም ገልጸው ይህም ሊታሰብበት የሚገባ ጉዳይ መሆኑን አንስተዋል።

ሳይንሳዊ ምርምሮችም የቫይረሱ ስርጭትም ሊጨምር እንደሚችል እያሳዩ መሆኑን ጠቁመው ኅብረተሰቡ ሳይዘናጋ ጥንቃቄ ማድረግ እንዳለበት ምክራቸውን ለግሰዋል።

የኮሮናቫይረስን ለመከላከል በአርቲስቶችና በተለያዩ አካላት እየተሰሩ ያሉ የግንዛቤ ማስጨበጫ ሥራዎች ይበልጥ ተጠናክሮ መቀጠል እንዳለበት አሳስበዋል።

ወረርሽኙን ለመከላከል በተለያዩ አካላት የሚደረጉትን ድጋፎች መንግሥት በአድናቆት እንደሚመለከተው ገልጸው ለዚህም ምስጋና አቅርበዋል።

በሌላ በኩል ቫይረሱን ለመከላከል በዜጎችና አገር በቀል ድርጅቶች አዳዲስ ሃሳቦች የመከላከያ አልባሳትና ቁሳቁሶች በስፋት እየተመረቱ መሆኑን ገልጸዋል።

እነዚህን የፈጠራ ሥራዎች ከሚመለከተው የመንግሥት አካላት ጋር በመቀናጀት ወደ ከፍተኛ ደረጃ ማሳደግና ማጎልበት እንደሚገባ ሚኒስትሯ ጠይቀዋል።

አገር በቀል ድርጅቶች የኮሮናቫይረስና ሌሎች በሽታዎችን ለማከም ጥቅም ላይ የሚውሉ መሣሪያዎችን እየጠገኑ መሆኑንም ተናግረዋል።

ድርጅቶቹ እነዚህን መሣሪያዎች በቀጣይ በአገር ውስጥ ለማምረት የሚያስችሉ ሥራዎች እያከናወኑ መሆኑን አስረድተው ተጠናክሮ መቀጠል አለበት ብለዋል።

በተጓዳኝም የጤና ተቋማት ለእናቶችና ለህጻናት ጤና ጨምሮ ለሌሎች በሽታ የሚሰጠው አገልግሎት እንዲጠናከር ክትትል እየተደረገ መሆኑን አስረድተዋል።