Fana: At a Speed of Life!

ቀድመው ለሚዘሩ ሰብሎች ማዳበሪያ እንዲደርስ እየተሰራ መሆኑ ተገለጸ

አዲስ አበባ፣ ሐምሌ 21፣ 2015 (ኤፍ ቢ ሲ) ቀድመው ለሚዘሩ ሰብሎች የአፈር ማዳበሪያ እንዲደርስ እየተሰራ መሆኑን የግብርና ሚኒስቴር ገለጸ።

የግብርና ሚኒስትር ግርማ አመንቴ (ዶ/ር) የማዳበሪያ አቅርቦትን ጨምሮ በወቅታዊ የግብርና ስራዎች ዙሪያ መግለጫ ሰጥተዋል።

በመግለጫቸውም በዚህ አመት ያጋጠመውን የማዳበሪያ አቅርቦት ችግር እንዳይደገም ከወዲሁ የቀጣዩን ዓመት የማዳበሪያ ግዢ ለመፈጸም መታቀዱን ተናግረዋል።

ከጫረታ የማዳበሪያ ግዥ በተጨማሪ ሌሎች አማራጮችንም በመጠቀም ችግሩን ለመፍታት እንደሚሰራ ጠቁመዋል።

የዚህ ዓመት የማዳበሪያ ፍላጎት ጥያቄ 20 ሚሊየን ኩንታል እንደነበረ ጠቅሰው÷ በ1 ቢሊየን ዶላር 13 ነጥብ 675 ሚሊየን ኩንታል ማዳበሪያ ተገዝቷል ብለዋል፡፡

በበጀት ዓመቱ በአጠቃላይ ከ15 ነጥብ 8 ሚሊየን ኩንታል በላይ ማዳበሪያ መቅረቡን ገልጸው፤ በተለይም በቆሎና ሌሎች ቀድመው ለሚዘሩ ሰብሎች ማዳበሪያ በወቅቱ ቀድሞ እንዲደርስ መሰራቱን ገልጸዋል።

አሁን ተገዝቶ የዘገየው ማዳበሪያ 11 ነጥ 9 ሚሊየን ኩንታል ጅቡቲ ደርሷል ያሉት ግርማ አመንቴ (ዶ/ር)÷ ከ10 ነጥብ 7 ሚሊየን በላይ የሚሆነው ደግሞ ወደ ሃገር ውስጥ ተጓጉዟል ብለዋል።

የቀረውን በፍጥነት ለማድረስ በቀን እስከ 200 ሺህ ኩንታል ማዳበሪያ ወደተለያዩ የአገሪቱ አካባቢዎች የማጓጓዝ ስራ እየተከናወነ መሆኑንም ተናግረዋል፡፡

የከረመውን ጨምሮ አርሶ አደሩ እጅ ላይ እስካሁን የደረሰው 10 ነጥብ 8 ሚሊየን ኩንታል መሆኑን አንስተው፤ ይህም መድረስ ካለበት ውስጥ 68 በመቶው መሆኑን ገልጸው÷ ቀሪውን ለአርሶ አደሩ ለማድረስ እየተሰራ እንደሚገኝ አመላክተዋል።

በቀሪ ቀናትም ማዕከላዊ መጋዝን የደረሰውን በፍጥነት ለማከፋፈልና ቀሪ 4 መርከቦችን ለማጓጓዝ ይሰራል ነው ያሉት።

ሕገወጥነት በማዳበሪያ ስርጭት ላይ ጫና መፍጠሩንና ሕገወጥነቱ ከሌሎች ጊዜያት በላይ ጎልቶ መታየቱንም ሚኒስትሩ ተናግረዋል።

ችግሩን ለመፍታት ቀድሞ የመግዛትና ግብይቱን ወደ ዲጂታል ለመቀየር ይሰራል ነው ያሉት።

በይስማው አደራው እና አፈወርቅ እያዩ

You might also like

Leave A Reply

Your email address will not be published.