Fana: At a Speed of Life!

በመዲናዋ በወረራ ታጥረው የተያዙ 15 ሺህ ቦታዎችና 68 ሺህ ሸራ ቤቶች ላይ እርምጃ ተወሰደ

አዲስ አበባ፣ ሐምሌ 24፣ 2015 (ኤፍ ቢ ሲ) በአዲስ አበባ በ2015 በጀት ዓመት በወረራ ታጥረው በተያዙ 15 ሺህ ቦታዎችና 68 ሺህ ሸራ ቤቶች ላይ እርምጃ መውሰዱን የከተማዋ ደንብ ማስከበር ባለስልጣን አስታወቀ፡፡

የባለስልጣኑ ዋና ስራ አስኪያጅ ሻለቃ ዘሪሁን ተፈራ ለፋና ብሮድካስቲንግ ኮርፖሬት እንዳሉት÷ በተጠናቀቀው በጀት ዓመት በመዲናዋ በተለያዩ ዘርፎች የሚስተዋሉ ሕገ-ወጥ ተግባራትን ለመከላከል በቅንጅት ተሰርቷል፡፡

በመሬት ወረራ፣ በሕገ ወጥ ንግድ፣ በአዋኪ ተግባራት፣ በሕገ ወጥ ማስታወቂያ እና እርድ እንዲሁም ሌሎች ተገቢ ያልሆኑ ተግባራት ላይ አስፈላጊው ቁጥጥር መደረጉን አንስተዋል።

በዚህ መሰረትም በአዲስ አበባ ሁሉም ክ/ከተሞች 15 ሺህ 749 በወረራ ተይዘው የታጠሩ ቦታዎችን በማስመለስ ለመንግስት ገቢማድረግ መቻሉን ተናግረዋል፡፡

በተመሳሳይ በመንገድ ላይ እና በተለያዩ ተቋማት አካባቢ ተሰርተው የነበሩ 68 ሺህ በላይ ሸራ ቤቶች ላይ እርምጃ መወሰዱን ነው ያረጋገጡት፡፡

በሌላ በኩል ባለስልጣኑ 8 ሺህ 235 በላይ ሕገ ወጥ ግንባታዎች ላይ አስፈላጊውን እርምጃ መወሰዱን ዋና ስራ አስኪያጁ አንስተዋል፡፡

በመዲናዋ በተለያዩ አካባቢዎች ሕገ ወጥ ንግድ በሚያከናውኑ 82 ሺህ 824 ሰዎች ላይም እርምጃ ተወስዷል ነው ያሉት፡፡

በመዲናዋ በትምህርት ቤቶች ዙሪያ አዋኪ ተግባራት በሚፈጽሙ 3 ሺህ 792 አካላት ላይም እርምጃ መወሰዱን ነው ያስረዱት፡፡

በተጨማሪም በተለያዩ ቦታዎች በነጋዴዎቸ በሚለጠፉ ደረጃቸውን ባልጠበቁ 392 ሺህ በላይ ሕገ ወጥ ማስታወቂያዎች ላይ እርምጃ መወሰዱን ጠቅሰዋል፡፡

ባለስልጣኑ በበጀት ዓመቱ ከተለያዩ ደንብ ጥሰቶች 32 ነጥብ 3 ሚሊየን ብር በላይ ለመንግስት ገቢ ማድረጉንም ተናግረዋል፡፡

በመላኩ ገድፍ

You might also like

Leave A Reply

Your email address will not be published.