Fana: At a Speed of Life!

በእነ ወንድወሰን አሰፋ (ዶ/ር)  የክስ መዝገብ  ያልቀረቡ ተከሳሾችን ፖሊስ አፈላልጎ እንዲያቀርብ ታዘዘ

አዲስ አበባ፣ ሐምሌ 25፣ 2015 (ኤፍ ቢ ሲ) በሽብር ወንጀል በተከሰሱት በእነ ወንድወሰን አሰፋ (ዶ/ር) የክስ መዝገብ ተካትተው ያልቀረቡ ተከሳሾችን ፖሊስ አፈላልጎ እንዲያቀርብ ታዘዘ፡፡

ትዕዛዙን የሰጠው የፌዴራል ከፍተኛ ፍርድ ቤት ልደታ ምድብ 3ኛ የጸረሽብር ጉዳዮች ወንጀል ችሎት ነው።

በእነ ወንድወሰን አሰፋ (ዶ/ር) የክስ መዝገብ በሽብር ወንጀል የተከሰሱት መስከረም አበራ፣ መሰረት ቀለመወርቅ (ዶ/ር) እና ዳዊት በጋሻውን ጨምሮ 23 ተከሳሾች ዛሬ ፍርድ ቤት ቀርበዋል፡፡

በአጠቃላይ በክስ መዝገቡ ከተካተቱ ከ51ተከሳሾች መካከል ሌሎች 28 ተከሳሾች ግን ችሎት አልቀረቡም።

ፍርድ ቤቱም ተከሳሾቹ  የክስ መቃወሚያ ካላቸው ለመጠባበቅና የምስክር ጥበቃ በሚመለከት  ብይን ለመስጠት እና የተለያዩ የተነሱ የመብት አቤቱታዎች ላይ ብይን ለመስጠት በያዘው ቀጠሮ መሰረት ተሰይሟል።

በዚህም የተከሳሽ ጠበቆች የክስ መቃወሚያ ካላቸው እንዲያቀርቡ በተጠየቁበት ወቅት” የክስ መቃወሚያ ከማቅረባችን በፊት የምናቀርበው አቤቱታ አለን ”በማለት የክስ መቃወሚያ ሳያቀርቡ ቀርተዋል።

በተጨማሪም ተከሳሾቹ አንድ ዳኛ ከመዝገቡ ላይ እንዲነሱላቸው  አቤቱታ  ያቀረቡ ሲሆን÷በፍርድ ቤቱ  አቤቱታው በጽሑፍ መቅረብ እንዳለበት ማብራሪያ ተሰጥቷል።

ከዚህ በፊት በተወሰኑ ተከሳሾች የተነሱ የመብት አቤቱታዎችን በሚመለከት ፍርድ ቤቱ እንዲፈጸምላቸው  ትዕዛዝ ሰጥቷል።

በተጨማሪም ፍርድ ቤቱ በመዝገቡ ላይ ያልቀረቡ 28 ተከሳሾችን በሚመለከት በቀጣይ ቀጠሮ ፖሊስ አፈላልጎ እንዲያቀርባቸው ትዕዛዝ ሰጥቷል።

ፍርድ ቤቱ ዐቃቤ ሕግ ለምስክሮች ጥበቃ ይደረግልኝ በማለት ያቀረበውን ጥያቄ በሚመለከት መርምሮ በቀጣይ ቀጠሮ ብይን እንደሚሰጥበት በመግለጽ÷ መዝገቡን ለጥቅምት 15 ቀን 2016 ተለዋጭ ቀጠሮ ሰጥቷል።

 

በታሪክ አዱኛ

You might also like

Leave A Reply

Your email address will not be published.