Fana: At a Speed of Life!

የመዲናዋ ነዋሪዎች የቤት ጣሪያና ግድግዳ ግብር ክፍያቸውን እስከ ነሐሴ 30 እንዲያጠናቅቁ ማሳሰቢያ ተሠጠ

አዲስ አበባ፣ ሐምሌ 26፣ 2015 (ኤፍ ቢ ሲ) የአዲስ አበባ ገቢዎች ቢሮ የመዲናዋ ነዋሪዎች የቤት ጣሪያና ግድግዳ ግብር ክፍያቸውን እስከ ነሐሴ 30 ቀን 2015 ዓ.ም ድረስ እንዲያጠናቅቁ አሳሰበ።

የአዲስ አበባ ከተማ ገቢዎች ቢሮ ኃላፊ አደም ኑሪ ፥ በቤት ወይም በከተማ ቦታ ኪራይና የቤት ግብር አዋጅ መሰረት የጣሪያና ግድግዳ የግብር ክፍያ ሲተገበር መቆየቱን ጠቅሰዋል።

በተጠናቀቀው በጀት ዓመት አዲስ የገበያ ጥናት በማድረግ በሚያዝያ ወር ላይ ወቅታዊ የማድረግ ስራ መሰራቱን አስታውሰዋል።

በዚህም መሰረት እንዲከፍሉ ይጠበቅባቸው የነበሩ ሰዎች እስካሁንም በመክፈል ላይ መሆናቸውን ገልጸው ፥ ከሚጠበቀው አንጻር በርካቶች ገና ናቸው ብለዋል።

በአዲሱ ጥናት መሰረት ለመኖሪያ ቤት 50 በመቶ እንዲሁም ለድርጅት 75 በመቶ እንዲከፍሉ መወሰኑንም ነው ያስታወሱት።

በጥናቱ መሰረት 800 ሺህ የሚጠጋ ግብር ከፋይ ይጠበቃል ያሉት ኃላፊው ፥ በአዲሱ ስሌት መሰረት እስካሁን 223 ሺህ ግብር ከፋዮች ብቻ መክፈላቸውን ተናግረዋል።

በእዚህም ቁጥሩ ከፍ ያለ ግብር ከፋይ እስካሁን አለመክፈሉን በመጥቀስ ነዋሪዎች የቤት ጣሪያና ግድግዳ ግብር ክፍያቸውን እስከ ነሐሴ 30 ቀን 2015 ዓ.ም እንደሚያጠናቀቁም ነው ያሳሰቡት።

ከዚህ ካለፈ ግን በህጉ መሰረት ተጨማሪ የቅጣት ክፍያ የሚከፍሉ መሆኑን አስረድተዋል።

በህጉ መሰረትም ከተቀመጠው ጊዜ ውጭ የሚመጡ ግብር ከፋዮች ባልተከፈለው ግብር መጠን 5 በመቶ ቅጣት የሚጠብቃቸው መሆኑን መግለጻቸውን የዘገበው ኢዜአ ነው።

በተለይም የትልልቅ ህንጻ ባለቤቶች ግብር የመክፈል አዝማሚያ እስካሁን ዝቅተኛ ነው ያሉት ኃላፊው ፥ በተሰጠው ጊዜ በመክፈል ግዴታቸውን እንዲወጡ አስገንዝበዋል።

You might also like

Leave A Reply

Your email address will not be published.