Fana: At a Speed of Life!

በማታለል ተግባር ከ14 ሚሊየን ብር በላይ ጉዳት እንዲደርስ አድርገዋል የተባሉ ተከሳሾች በጽኑ እስራት ተቀጡ

አዲስ አበባ፣ ሐምሌ 26፣ 2015 (ኤፍ ቢ ሲ) የማታለል ተግባር በመፈጸም በአዲስ ብድርና ቁጠባ ተቋም ላይ ከ14 ሚሊየን ብር በላይ ጉዳት እንዲደርስ አድርገዋል የተባሉ ተከሳሾች በጽኑ እስራት ተቀጡ።

የቅጣት ውሳኔውን ያሳለፈው የፌደራል ከፍተኛ ፍርድ ቤት ልደታ ምድብ 3ኛ የሙስና ጉዳዮች ወንጀል ችሎት ነው።

ተከሳሾቹ÷ በግል ስራ የሚተዳደሩት 1ኛ ሱራፌል በቀለ እና ባለቤታቸው 2ኛ ወ/ሮ ራኬብ መንግስቱ፣ 3ኛ የአዲስ ብድርና ቁጠባ ተቋም የንፋስ ስልክ ላፍቶ ቅርጫፍ ጽ/ቤት ወረዳ 12 የደንበኞች አገልግሎት ኦፊሰር የነበረው ግርማ ጊታ፣ 4ኛ የአዲስ ብድርና ቁጠባ ተቋም የንፋስ ስልክ ላፍቶ ቅርጫፍ ጽ/ቤት ወረዳ 12 ስራ አስኪያጅ የነበረው አበበ አያሌው እና 5ኛ የእዚሁ ቅርጫፍ ጽ/ቤት ሞተረኛ (መልክተኛ) የነበረው ይድነቃቸው ዙማ ናቸው።

1ኛና 2ኛ ተከሳሾች ከአዲስ አበባ ከተማ አሽከርካሪና ተሽከርካሪ ባለስልጣን የተሽከርካሪ ባለቤትነት በስማቸው ያልተመዘገበ በሌላ ድርጅትና ግለሰብ ስም የተመዘገቡ ሀሰተኛ የተሽከርካሪ የብድር ዋስትና ውል እና ማስያዢያ በማቅረብ ከነሐሴ 29 ቀን 2013 ዓ.ም እስከ ታህሳስ 13 ቀን 2014 ዓ.ም ባሉት ቀናት በቀሪ ተከሳሾች ተባባሪነት ተቋሙን ማታለላቸው ተገልጿል፡፡

በዚህም 1ኛ ተከሳሽ 10 ሚሊየን ብር 2ኛ ተከሳሽ 6 ሚሊየን ከተቋሙ ብድር መውሰዳቸውን ፍርድ ቤቱ ማረጋገጡን ገልጿል።

1ኛና 2ኛ ተከሳሾች የወሰዱትን ብድር አለመክፈላቸውን ተከትሎም በመያዢያ ያስያዙትን ተሽከርካሪ የአዲስ ብድርና ቁጠባ ተቋም ሽጦ እዳውን ለማስመለስ ሲንቀሳቀስ የተሽከርካሪ ዋስትናዎቹ ሀሰተኛ ሆነው መገኘታቸው ተጠቅሷል፡፡

በዚህም በተቋሙ ላይ 1ኛ ተከሳሽ 9 ሚሊየን 777 ሺህ 74 ብር ከ90 ሳንቲም እንዲሁም 2ኛ ተከሳሽ 5 ሚሊየን 208 ሺህ 430 ብር ከ70 ሳንቲም ጉዳት ማድረሳቸው በዐቃቤ ሕግ የሰው እና የሰነድ ማስረጃ መረጋገጡ ተመላክቷል፡፡

4ኛ ተከሳሽ አቶ አበበ አያሌው 1ኛና 2ኛ ተከሳሾች ማሟላት የሚገባቸውን ፎርማሊቲዎች እንዲያካሂዱም ሆነ ብድሩ እንዲሰጣቸው ከዋናው ቢሮ ሳይፈቀድ ፎርማሊቲዎችን እንዲያካሂዱ በማድረግ የብድር ውል፣ የተሽከርካራ ዋስትና ውል፣ የሕይወት መድህን ውል፣ በቼክ ዋስትና ውል እንዲሁም የአንድነትና የነጠላ ኃላፊነት የተሽከርካሪ ዋስትና ውል ታህሳስ 23 ቀን 2014 ዓ.ም መስጠቱን ፍርድ ቤቱ በዐቃቤ ሕግ ማስረጃ ማረጋገጡን ገልጿል፡፡

ከ4ኛ ውጪ የሚገኙ ተከሳሾችን በሙስና ወንጀሎች አዋጅ ቁጥር 881/2007 አንቀጽ 32 (2) እና ሀሰተኛ ሰነድ ማቅረብ ከባድ አታላይነት ወንጀል ድንጋጌ በወ/መ/ስ/ህ/ቁጥር 142 መሰረት በሙሉ ድምጽ እንዲከላከሉ ብይን ተሰጥቶ ነበር።

4ኛ ተከሳሽን ግን በወ/መ/ስ/ሕ/ቁጥር 113/2 መሰረት የተከሰሰበትን ስልጣንን አላግባብ መጠቀም የሚለውን ድንጋጌ በመለወጥ በሙስና ወንጀሎች አዋጅ ቁጥር 881/2007 አንቀጽ 13/1/ሐ ስር ተከሳሹ በአንድ ዳኛ የሀሳብ ልዩነት በአብላጫ ድምጽ እንዲከላከል ብይን ተሰጥቷል።

ችሎቱ ተከሳሾቹ እንዲከላከሉ በሰጠው ብይን መሰረት የተከሳሾቹን የክስ የመከላከያ ማስረጃ ከመረመረ በኋላ ተከሳሾቹ የዐቃቤ ሕግ ማስረጃን በአግባቡ ባለመከላከላቸው የጥፋተኝነት ውሳኔ አሳፏል፡፡

የግራ ቀኝ የቅጣት ማቅለያ አስተያየት በመያዝ ÷ 1ኛ ተከሳሽ በ5 ዓመት ጽኑ እስራት፣ 2ኛ ተከሳሽ በ3 አመት ጽኑ እስራት እንዲቀጡ ፍርድ ቤቱ ወስኗል፡፡

ቀሪ ተከሳሾችንም ከ3 አመት ጽኑ እስራት እስከ 1 አመት በሚደርስ ቀላል እስራት እንዲቀጡ ተወስኗል።

በታሪክ አዱኛ

You might also like

Leave A Reply

Your email address will not be published.