Fana: At a Speed of Life!

ወደ ውጭ ከተላኩ ማዕድናት 226 ነጥብ 8 ሚሊየን ዶላር ገቢ ተገኘ

አዲስ አበባ፣ ሐምሌ 26፣ 2015 (ኤፍ ቢ ሲ) ወደ ውጭ ከተላኩ ማዕድናት 226 ነጥብ 8 ሚሊየን ዶላር ገቢ መገኘቱ ተገለጸ፡፡

የማዕድን ሚኒስቴር የ2015 በጀት ዓመት አፈጻጸም ተገምግሟል፡፡

በግምገማውም÷ በበጀት ዓመቱ 896 ነጥብ 8 ሚሊየን ብር ካፒታል ላስመዘገቡ የሀገር ውስጥና የውጪ ሀገራት አልሚዎች በማዕድን ፍለጋ ምርትና ፕሮሰሲንግ ፈቃድ መሰጠቱም ተመላክቷል፡፡

የድንጋይ ከሰል ሀገራዊ ምርትን በማሳደግ ሙሉ በሙሉ ከውጭ የሚገባውን ለመተካት እየተሰራ ስለመሆኑም ተመልክቷል፡፡

የወርቅ መግዣ ማበረታቻም ከ35 ወደ 60 በመቶ ማሳደግ መቻሉ ተገልጿል፡፡

የማዕድን ሚኒስትሩ ሃብታሙ ተገኝ (ኢ/ር) እንዳሉ÷ ሥራ አቁመው የነበሩ ሞሶቦ ሲሚንቶ፣ ካፒታል ሲሚንቶ እና ፓዮኒር ሲሚንቶ ፋብሪካዎች ወደ ስራ ለማስገባት እየተሰራ ነው፡፡

እንደ ለሚ ናሽናል ሲሚንቶ፣ አባይ ሲሚንቶ እና በረንታ ሲሚንቶ ፋብሪካዎች ያሉ አዳዲስ ፋብሪካዎችንም ወደ ስራ በማስገባት የአቅርቦት መጠኑን ለመቅረፍ እየተሰራ ስለመሆኑም ጠቁመዋል፡፡

የብረት ምርት ችግርን ለመቅረፍ ቁርጥራጭ ብረቶችን ከተቋማት ለማንሳት ጅምሮች ቢኖሩም ተቋማት በሚፈለገው ደረጃ ተባባሪ አለመሆናቸውን አመላክተዋል፡፡

የፕላንና ልማት ሚኒስትር ፍጹም አሰፋ (ዶ/ር) የማዕድን ዘርፍ ለሀገሪቱ ቁልፍ የኢኮኖሚ ዘርፍ መሆኑን ገልጸዋል፡፡

የተቋሙን አቅም በመገንባት ላይ በትኩረት ሊሰራ እንደሚገባ መናገራቸውን የፕላንና ልማት ሚኒስቴር መረጃ ያመላክታል፡፡

You might also like

Leave A Reply

Your email address will not be published.