Fana: At a Speed of Life!

ለ1 ነጥብ 2 ሚሊየን አቅመ ደካሞች ነጻ የጤና ምርመራና ሕክምና አገልግሎት ለመስጠት እየተሠራ ነው

አዲስ አበባ፣ ሐምሌ 27፣ 2015 (ኤፍ ቢ ሲ) በያዝነው የክረምት ወቅት ለ1 ነጥብ 2 ሚሊየን ወገኖች ከ150 ሚሊየን ብር በላይ ዋጋ ያለው ነጻ የጤና ምርመራና ሕክምና አገልግሎት ለመስጠት እየተሠራ መሆኑን ጤና ሚኒስቴር ገለጸ፡፡

ነጻ የጤና ምርመራና ሕክምና አገልግሎቱ የተለያዩ የሕብረተሰብ ክፍሎችን እና ባለድርሻ አካላትን በማሳተፍ በመላ ሀገሪቱ እየተሰጠ መሆኑን የሚኒስቴሩ የሕዝብ ግንኙነትና ኮሙኒኬሽን ሥራ አስፈጻሚ ዶክተር ተገኔ ረጋሳ ተናግረዋል፡፡

የጎዳና ተዳዳሪዎች እና ከፍለው የጤና ምርመራ እና ሕክምና ማድረግ የማይችሉ አቅመ ደካሞችን ለመደገፍ ያለመ አገልግሎት ስለመሆኑም አስገንዝበዋል፡፡

ገና ያልተጠቃለሉ እና ለሚኒስቴሩ ያልደረሱ ሪፖርቶች እንደተጠበቁ ሆነው÷ እስካሁን ከ100 ሺህ በላይ ወገኖች የአገልግሎቱ ተጠቃሚ ሆነዋል ብለዋል፡፡

አገልግሎቱ በሁሉም ክልሎች እና ከተማ አስተዳደሮች፣ በፌደራል ደረጃ በሚገኙ ሆስፒታሎች እንዲሁም ፈቃደኛ በሆኑ የተመረጡ የግል ሕክምና ተቋማት እየተሰጠ መሆኑን ነው ለፋና ብሮድካስቲንግ ኮርፖሬት የተናገሩት፡፡

አፈጻጸሙ ጥሩ መሆኑን ገልጸው÷ አገልግሎቱ እስከ ነሐሴ 30 ቀን 2015 ዓ.ም ድረስ ተጠናክሮ እንዲቀጥል አቅጣጫ መቀመጡን አመላክተዋል፡፡

በየደረጃው የሚገኙ ባለድርሻ አካላት የምርመራና ሕክምና ድጋፍ የሚያስፈልጋቸውን ወገኖች በማገዝ የተቀመጠውን ዕቅድ ለማሳካት እንዲረባረቡ ጥሪ አቅርበዋል፡፡

የ2015 ዓ.ም የክረምት ወቅት የበጎ ፈቃድ አገልግሎት አካል የሆነው ነጻ የጤና ምርመራና ሕክምና አገልግሎት በሀገር አቀፍ ደረጃ ከሁለት ሣምንት በፊት በአዲስ አበባ ከተማ በቅዱስ ጴጥሮስ ሆስፒታል መጀመሩ ይታወሳል፡፡

በዮሐንስ ደርበው

You might also like

Leave A Reply

Your email address will not be published.