Fana: At a Speed of Life!

የደቡብ ክልል አደረጃጀት ላይ ያተኮረ የውይይት እየተካሄደ ነው

አዲስ አበባ፣ ሐምሌ 26፣ 2015 (ኤፍ ቢ ሲ) የደቡብ ክልል አደረጃጀት ላይ ትኩረት ያደረገ የአመራሮች ውይይት በሀዋሳ ከተማ እየተካሄደ ነው፡፡

የብልጽግና ፓርቲ ምክትል ፕሬዚዳንት አቶ አደም ፋራህ በውይይት መድረኩ ላይ እንደገለጹት÷ አደረጃጀት በራሱ ግብ ባለመሆኑ የነበረንን የሚያሳጣ ሳይሆን ለህብረተሰቡ እሴት የሚጨምር ሊሆን ይገባል።

በፓርቲው ጉባኤ ወቅት በየአካባቢው ህዝቡ የሚያነሳቸው ጥያቄዎች እየተመለሱ ሊሄዱ ይገባል የሚል አቅጣጫ መቀመጡን ተከትሎ በክልሉ ህዝቡ የሚያነሳቸውን የአደረጃጀት ጥያቄዎች ምላሽ ለመስጠት ወደ ተግባር መገባቱንም አንስተዋል፡፡

ለዚህም÷ በደቡብ ክልል እየተነሳ ያለውን የአደረጃጀት ጥያቄዎች በ90 ቀን እቅድ ውስጥ እንዲካተት በማድረግ ተግባሩ የሚመራበት ዝርዝር እቅድ በማዘጋጀት ከአመራሩ እና ከህዝቡ ጋር በጋራ መምከር እንደተቻለም ነው የገለጹት፡፡

የውይይት መድረኩ የክልል አደረጃጀት ጥያቄዎች ላይ እስካሁን የተሰሩ ስራዎች እና ቀሪ የአመራሩ ሚና ላይ የጋራ መግባባት ላይ መድረስ ለማስቻል ታሳቢ ያደረገ ነው ብለዋል አቶ አደም ፋራህ፡፡

ህዝቡ እያነሳ ያለውን የአደረጃጀት ጥያቄ እንደ ፓርቲ መርተን እየፈጸምነው ያለው ታሪካዊ ክንውን ነው ያሉት ምክትል ፕሬዝዳንቱ አመራሩ እስካሁን የተሰሩ ስራዎችን ተገንዝቦ ለቀሪ ተግባራት መዘጋጀት እንዳለበትም አሳስበዋል፡፡

በአመራር ደረጃ የህዝቡን የአደረጃጀት ጥያቄዎች ለመመለስ መላውን ህዝብ ያሳተፈ እና ህገ መንግስታዊ በሆነ ሂደት ውስጥ ማለፍ መቻሉን  የገለጹት አቶ አደም ፋራህ ከአመራር እስከ ህዝቡ ወጥነት ያለው የጋራ ተግባቦት ስለመፈጠሩም አንስተዋል፡፡

የደቡብ ክልል ርዕሰ መስተዳድር አቶ ርስቱ ይርዳው በበኩላቸው÷ መድረኩ ከክልል አደረጃጀት አኳያ በአመራር ደረጃ የጋራ ግንዛቤ ለመፍጠር መዘጋጀቱን ተናግረዋል።

በክልሉ እየተነሳ ያለው የአደረጃጀት ጥያቄዎች ወደ መጨረሻው ምዕራፍ መሸጋገሩን የተናገሩት ርዕሰ መስተዳድሩ የአደረጃጀት ጥያቄው ምላሽ እንዲያገኝ ለመሩ እና ላስተባበሩ አካላት ምስጋና አቅርበዋል።

በውይይት መድረኩ ከፌደራል፣ ከክልል፣ ከዞን እና ከልዩ ወረዳዎች የተውጣጡ ከፍተኛ የስራ ኃላፊዎች መገኘታቸውን ከደቡብ ክልል ኮሙኒኬሽን ያገኘነው መረጃ ያመላክታል፡፡

You might also like

Leave A Reply

Your email address will not be published.