Fana: At a Speed of Life!

ዩክሬን በምዕራባውያን የጦር ታክቲኮች ተስፋ ቆርጣለች – ኒዮርክ ታይምስ

አዲስ አበባ ፣ ሐምሌ 27 ፣ 2015 (ኤፍ ቢ ሲ) ዩክሬን የሩሲያን ጦር ለመመከት ምዕራባውያን ባሳዩዋቸው የጦር ታክቲኮች ተስፋ ቆርጣለች ሲል የአሜሪካው ኒዮርክ ታይምስ ጋዜጣ አስነብቧል፡፡

ኒዮርክ ታይምስ እንደዘገበው÷ በኔቶ የተሳሳተ የጦር እቅድ ምክንያት ዩክሬን ከባድ ወታደራዊ ኪሳራ አጋጥሟታል፣ ወታደሮቿንም እሳት ላይ ጥዳለች ብሏል፡፡

በመሆኑም የዩክሬን ጦር ምዕራባውያን የቀየሱለትን የጦር ታክቲክ ወደ ጎን በመተው ከሩሲያ ሀይሎች ጋር በረጅም ርቀት የመዋጋት ስልትን ለመከተል መወሰኑ ነው የተገለፀው፡፡

ይሁን እንጂ ኪየቭ እንደዚህ አይነቱን የውጊያ ስልት ለማከናወን በቂ የረጅም ርቀት መሳሪያዎች ይኑራት አይኑራት የታወቀ ነገር የለም ተብሏል፡፡

ዩክሬን ከፍተኛ ግምት የተሰጠውን የመልሶ ማጥቃት ዘመቻ በሰኔ ወር ተግባራዊ ብታደርግም የተፈለገውን ውጤት ሳያመጣ በሩሲያ ሀይሎች መክሸፉ ተገልጿል፡፡

በተለይም የዩክሬን መልሶ ማጥቃት በአየር ሀይል የታገዘ አለመሆኑ ከምዕራባውያን በዕርዳታ ያገኘቻቸው ዘመናዊ ታንኮች እና ወታደራዊ ተሸከርካሪዎች በሩሲያ ሀይሎች ሊማረኩ መቻላቸው ተመላክቷል፡፡

በመልሶ ማጥቃቱ ዩክሬን 30 ሺህ ወታደሮቿን ያጣች ሲሆን በኔቶ ከሰለጠኑት ብርጌዶች አንዱ የሆነው 47ኛ ብርጌድ 30 በመቶ የሚሆነውን የእግረኛ ተሸከርካሪዎች ማጣቱ ተዘግቧል፡፡

ለእነዚህ ኪሳራዎች ምላሽ ለመስጠት የዩክሬን ጦር አዛዦች አዲስ የጦር ስልት መቀየሳቸው የተገለፀ ሲሆን በመልሶ ማጥቃት የዩክሬን ሀይሎች በረዥም ርቀት ለመዋጋት መወሰናቸው ተሰምቷል፡፡

You might also like

Leave A Reply

Your email address will not be published.