Fana: At a Speed of Life!

የሦስት ሐይቆች 9 ሺህ 210 ሔክታር ክፍል በእንቦጭ አረም መሸፈኑ ተጠቆመ

አዲስ አበባ፣ ሐምሌ 29፣ 2015 (ኤፍ ቢ ሲ) የስምጥ ሸለቆ ሐይቆች ውስጥ ዝዋይ 1 ሺህ 375፣ አባያ 7 ሺህ 810 እና ጫሞ 25 ሔክታር በእንቦጭ አረም መወረራቸውን የስምጥ ሸለቆ ሐይቆች አስተዳደር ጽ/ቤት አስታወቀ፡፡

እስካሁን ባለው ሂደት 120 ሔክታር ብቻ የእምቦጭ አረም ከዝዋይ ሐይቅ መወገዱን የጽ/ቤቱ ኃላፊ ዴቢሶ ዴዴ ለፋና ብሮድካስቲንግ ኮርፖሬት ተናግረዋል፡፡

በአባያና ጫሞ ሐይቆች ውስጥ አዞዎች በመኖራቸው የመከላከል ሥራው በሰው ኃይል እንዳይከናወን ማድረጉን ጠቁመው÷ በቴክኖሎጂ የታገዘ የአወጋገድ ሥርዓት ለመከተል ከአጋር አካላት ጋር ይሠራል ብለዋል፡፡

በቂ የሰው ኃይል ተሳትፎ አለመኖር፣ ሥራው በቴክኖሎጂ አለመደገፉ፣ የተቋማት ተሳትፎ ውስንነት፣ በዘርፉ በቂ የምርምር ሥራዎች አለመኖር፣ የበጀት እጥረት፣ የሎጂስቲክስና የቁሶች አቅርቦት በሚፈለገው መጠን አለመሆን አረሙን ለማስወገድ ያጋጠሙ ችግሮች መሆናቸውን አብራርተዋል፡፡

በቀጣይም በዘመቻ መልክ በሰው ኃይል፣ በሐይቆቹ አካባቢ ለሚገኙ ባለድርሻ አካላት በሔክታር ከፋፍሎ በመስጠት እንዲሁም በጥናትና በቴክኖሎጂ በመታገዝ እንቦጭ አረምን ለማስወገድ ታቅዷል ነው ያሉት፡፡

ከአስር አደገኛ ተስፋፊና ወራሪ አረሞች መካከል አንዱ የሆነው እንቦጭ÷ ምቹ ሁኔታ ካገኘ በየሁለት ሳምንቱ እራሱን በእጥፍ የማባዛት አቅም አለው፡፡

የእንቦጭ አረም ጨዋማነት የሌለውን ማንኛውም የውሃ አካል (ሐይቅ፣ ወንዝ፣ ኩሬ፣ ግድብ፣ የመስኖ ዳይክ የመሳሰሉትን) ያጠቃል፡፡

በዮሐንስ ደርበው

You might also like

Leave A Reply

Your email address will not be published.