Fana: At a Speed of Life!

ሦስት የአየር ሁኔታ መከታተያ ራዳሮች ተከላ እየተከናወነ ነው

አዲስ አበባ፣ ነሐሴ 2፣ 2015 (ኤፍ ቢ ሲ) ኢትዮጵያ ካላት የቆዳ ስፋትና መልክዓ-ምድር አኳያ ከ12 በላይ የአየር ሁኔታ መከታተያ ራዳሮች እንደሚያስፈልጋት ተመለከተ።

በሚቲዎሮሎጂ ጣቢያዎች ማስተር ፕላንና የኢትዮጵያ ሚቲዎሮሎጂ ኢንስቲትዩት የ10 ዓመት መሪ ዕቅድ ላይ እንደሀገር ከ12 በላይ የአየር ሁኔታ መከታተያ ራዳሮች ቢያስፈልጉም በሥራ ላይ ያለው አንድ ብቻ መሆኑ ተገልጿል።

በመሆኑም ፍላጎቱን ለመሙላትና አገልግሎቱን ለማሳደግ ከ300 ሚሊየን ብር በላይ ዋጋ ያላቸው 3 የአየር ሁኔታ መከታተያ ራዳሮች ተከላ፥ በእነዋሪ፣ ጎሬ እና ሃላባ ቁሊቶ እየተከናወነ ስለመሆኑ የኢትዮጵያ ሚቲዮሮሎጂ ኢንስቲትዩት ገልጿል።

በኢንስቲትዩቱ የረጅም ጊዜ ትንበያና የድርቅ ክትትል ዴስክ ኃላፊ ሙሉዓለም አበራ እንዳስገነዘቡት÷ ተጨማሪ ራዳሮችን የተለያየ የአየር ፀባይ ባላቸው የሀገሪቱ ክፍሎች በመትከል ተደራሽነቱ የሰፋ ቦታ ተኮር ትንበያ ለመሥጠት መሥራት ይገባል።

አንድ ራዳር እስከ 250 ኪሎ ሜትር የከባቢ አየር መረጃን ከመሬት ጀምሮ በተለያየ ከፍታ በመመዝገብ ጥቅም እንደሚሰጥ አስረድተዋል።

ከጥቅሞቹ መካከልም፥ የመብረቅ መከሰትን ለመከታተልና ለመተንበይ፣ በአውሮፕላን በረራ ወቅት አደገኛ የሆኑ የደመና ዓይነቶችንና ነፍሳትን በመለየት ቅድመ-ማስጠንቀቂያ ለመስጠትና ሌሎች ተዛማጅ አገልግሎቶች ይገኙበታል ነው ያሉት።

እንዲሁም የተጠናከረ አስጊ የአየር ሁኔታን ለመከታተል፣ የጎርፍ የቅድሚያ ማስጠንቀቂያ፣ የዝናብ መጠን ስርጭትን ለማወቅ፣ ደመና በማበልጸግ የዝናብ እጥረትና ድርቅ ተጽዕኖዎችን ለመቀነስ፣ በአውሮፕላን ማረፊያ የሚከሰቱ በረራ የሚያስተጓጉሉ ጉሞችን ለመበተን ከጥቅሞቹ መካከል ይጠቀሳሉ ብለዋል።

ትንበያዎችን በጥራት፣ ጊዜና ቦታ ለማከናወን ከራዳር የሚሰበሰቡ መረጃዎች ወሳኝ እና አስፈላጊ መሆናቸውንም ነው አቶ ሙሉዓለም ለፋና ብሮድካስቲንግ ኮርፖሬት የተናገሩት።

በዮሐንስ ደርበው

ወቅታዊ፣ትኩስ እና የተሟሉ መረጃዎችን ለማግኘት፡-

ድረ ገጽ፦ https://www.fanabc.com/
ፌስቡክ፡- https://www.facebook.com/fanabroadcasting
ዩትዩብ፦ https://www.youtube.com/c/fanabroadcastingcorporate/
ቴሌግራም፦ https://t.me/fanatelevision
ትዊተር፦ https://twitter.com/fanatelevision በመወዳጀት ይከታተሉን፡፡
ኢንስታግራም፦ https://www.instagram.com/fana_television/
ቲክቶክ፦ https://www.tiktok.com/@fana_television

ዘወትር፦ ከእኛ ጋር ስላሉ እናመሰግናለን!

You might also like

Leave A Reply

Your email address will not be published.