Fana: At a Speed of Life!

የአየር ንብረት ለውጥን ለመከላከል ችግኞችን በመትከል ሀገራዊ ድርሻን መወጣት እንደሚገባ ተገለጸ

አዲስ አበባ፣ ነሐሴ 2፣ 2015 (ኤፍ ቢ ሲ) ዓለም እንደ ደን መጨፍጨፍ፣ የአየር ንብረት ለውጥ እና የብዝሀ ህይወት መጥፋት የመሳሰሉ ተግዳሮቶች በተጋረጡባት ወቅት የአየር ንብረት ለውጥን ለመከላከል ችግኞችን በመትከል ሀገራዊ ድርሻን መወጣት እንደሚገባ የኢኖቬሽንና ቴክኖሎጂ ሚኒስትር ዴዔታ ባይሳ በዳዳ (ዶ/ር) ገለጹ፡፡

የኢኖቬሽንና ቴክኖሎጂ ሚኒስቴር ከተጠሪው ተቋማት ከፍተኛ የሥራ ሀላፊዎች እና ሰራተኞች ጋር በመተባበር በኢትዮጵያ የተጀመረውን የችግኝ ተከላ ፕሮግራም በማስቀጠል በደቡብ ምዕራብ ኢትዮጵያ ህዝቦች ክልል ሸካ ዞን የኪ ወረዳ የችግኝ ተከላ መርሐ ግብር አካሂዷል።

በዚህ ወቅት ሚኒስትር ዴዔታ ባይሳ በዳዳ ( ዶ/ር)፥ በዜግነት አገልግሎት እያንዳንዱ ህብረተሰብ ሀላፊነት ወስዶ መስራት አለበት ብለዋል፡፡

ተቋሙ በወረዳው ለሚገኙ አቅመ ደካሞች የቤት እድሳት መርሐ ግብር ያስጀመረ ሲሆን፥ የመማር አቅም ላጡ ሕፃናት የማስተማሪያ ቁሳቁሶችን እገዛ ማድረጉን የሚኒስቴሩ መረጃ ያመላክታል፡፡

በመርሐ ግብሩ የኢኖቬሽንና ቴክኖሎጂ ሚኒስትር ዴዔታ ሁሪያ አሊ፥ ሰላም ቀዳሚው ተግባር በመሆኑ በሰላም ለኢትዮጵያ ተምሳሌት የሆነውን ክልል ያለውን ሰላም በማስቀጠል ብልፅግናን ማረጋገጥ እንደሚገባ ገልጸዋል፡፡

በተጨማሪም የተቋሙ ባለሙያዎችና የስራ ሃላፊዎች በወረዳው እየለማ ያለውን የበቆሎ ማሳ እና የቅመማ ቅመም ምርት እንዲሁም በቴፒ ሚዛን ዩኒቨርሲቲ የቴክኖሎጂና የምርምር ማዕከልንና የኢንፎርሜሽን ቴክኖሊጂ ክፍልን ጎብኝተዋል፡፡

You might also like

Leave A Reply

Your email address will not be published.