Fana: At a Speed of Life!

ከ53 ሺህ በላይ ለሚሆኑ ዜጎች የውጭ ሀገር የሥራ ስምሪት እድል ተፈጠረ

አዲስ አበባ፣ ነሐሴ 3፣ 2015(ኤፍ ቢ ሲ) በሥራ ገበያ መረጃ ሥርዓት አማካኝነት ባለፉት ሦስት ወራት ከ53 ሺህ በላይ ለሚሆኑ ዜጎች የውጭ አገር የሥራ ስምሪት እድል መፈጠሩን የስራና ክህሎት ሚኒስቴር አስታወቀ፡፡

የሚኒስቴሩ አመራሮችን፣ የቴክኒክና ሙያ ኮሌጅ ዲኖችንና ባለድርሻ አካላትን ያሳተፈ የሥልጠና እና የውይይት መድረክ በኢትዮጵያ ፖሊስ ዩኒቨርሲቲ እየተካሄደ ነው።

መድረኩ በቆይታው ተቋሙ ያከናወናቸው የለውጥ ሥራዎች፣ የተገኙ ውጤቶችና ቀጣይ ዕቅዶች ላይ ውይይት እንደሚደረግ ተገልጿል፡፡

በትናንትናው ዕለትም በአመራር ጥበብና ስኬታማ የአሰራር ሂደቶች ላይ ስልጠና መሰጠቱን የገለጸው ኢዜአ ነው።

የሥራና ክህሎት ሚኒስትር ሙፈሪሃት ካሚል እንደተናገሩትም፥ የውጭ ሀገር የሥራ ስምሪት በቴክኖሎጂ በመተገዝ ውጤታማ ለማድረግ እየተሰራ መሆኑን ተናግረዋል፡፡

በዚህም ዲጂታል የሥራ ገበያ መረጃ ሥርዓት ተግባራዊ የተደረገ ሲሆን ፥ ባለፉት ሶስት ወራትም በገበያ መረጃ ስርዓቱ አመካኝነት ከ53 ሺህ በላይ ዜጎች በሕጋዊ መንገድ ለሥራ ወደ ውጭ ሀገር መሄዳቸውን ነው የገለጹት።

በ2015 በጀት ዓመት በአጠቃላይ 105 ሺህ ዜጎች በሕጋዊ መንገድ ወደ ውጭ ለስራ መሰማራታቸውን ጠቁመው ፥ ይሄው ሥራ ተጠናክሮ እንደሚቀጥል አብራርተዋል።

የኢትዮጵያ የሥራ ገበያ መረጃ ሥርዓት ከተዘረጋ ወዲህ የተለያዩ ሀገራት ፍላጎት እያቀረቡ መሆኑን ጠቅሰው ፥ እስካሁን ባለው 2 ሚሊዮን የስራ ፍላጎቶች ቀርበውልናል ነው ያሉት።

በሌላ በኩል ሚኒስቴሩ የሥራ ፈጠራ ሃሳብ ያላቸው ዜጎችን በማወዳደር ወደ ሥራ የሚቀይሩበት የድጋፍ ማዕቀፍ መዘርጋቱን ገልጸዋል።

በስራ ፈጠራ ሀሳብ ውድደር አሸናፊ የሚሆኑ ዜጎች ከልማት ባንክ ጋር በመተባበር ስልጠና እና የመስሪያ ቦታ ድጋፍ አግኝተው ወደ ሥራ የሚሰማሩበት ዝግጅት በመደረግ ላይ መሆኑን ነው ያነሱት።

በተጠናቀቀው በጀት ዓመት በአጠቃላይ በጥቃቅንና አነስተኛ፣ በግብርና፣ አምራች፣ አገልግሎትና መሰል መስኮች ለ3 ነጥብ 5 ሚሊየን ዜጎች የሥራ ዕድል መፈጠሩንም ጨምረው ገልጸዋል።

You might also like

Leave A Reply

Your email address will not be published.