Fana: At a Speed of Life!

የእጩ አሽከርካሪዎች ሥልጠና ሒደት ላይ የሚታዩ ብልሹ አሰራሮችን የሚቀርፍ የዲጂታል ስርዓት ተዘረጋ

አዲስ አበባ፣ ነሐሴ 3፣ 2015 (ኤፍ ቢ ሲ) ለእጩ አሽከርካሪዎች ፍትሃዊና ቀልጣፋ አገልግሎት መስጠት የሚያስችል የዲጂታል ስርዓት መዘርጋቱን የቃሊቲ አዲስ አሽከርካሪዎች ፈቃድና ብቃት ማረጋገጫ ጽ/ቤት አስታወቀ፡፡

የጽሕፈት ቤቱ ስራ አስኪያጅ አቶ ያዜ የሻምበል እንደገለጹት÷ በእጩ አሽከርካሪዎች የስልጠ ሒደት ላይ የሚስተዋሉ ብልሹ አሰራሮችን በዘላቂነት ለመቅረፍ የተለያዩ ስራዎች እየተከናወኑ ነው፡፡

በዚህ መሰረትም ጽህፈት ቤቱ ለሰልጣኞች ቀልጣፋ እና ፍትሃዊ አገልግሎት መስጠት የሚያስችል ዲጂታላይዝ ስርዓት መዘርጋቱን ነው ለፋና ብሮድካስቲንግ ኮርፖሬት ያስረዱት፡፡

የእጩ አሽከርካሪዎች ስልጠና ሒደት ከመጀመሪያ እስከ ፍጻሜው በቴክኖሎጂ ስርዓት የተሳሰረ መሆኑን ጠቁመው÷ ስልጠናውና ፈተናውም በካሜራ የተደገፈ እንደሆነ አብራርተዋል፡፡

ተማሪዎች የስልጠና ጊዜያቸውን ሳያጠናቅቁ ወደ ፈተና እንዳይቀርቡ የሚቆጣጠር ስርዓት መዘርጋቱንም ጠቁመዋል፡፡

የንድፈ ሃሳብ ፈተና ተፈታኞች በአጭር የጽሑፍ መልዕክት በሚላክላቸው ኮድ ራሳቸው ኮምፒውተር ላይ አስገብተው ፈተና እንዲፈተኑና ውጤታቸውን እዚያው እዲያውቁ ይደረጋልም ብለዋል፡፡

በተግባር ፈተና ወቅት ተፈታኝ ከፈታኝ ባለሞያ ጋር ምንም አይነት ግንኙነት ሳይኖረው መለያ ኮድ ተሰጥቶት በካሜራ ብቻ እንዲፈተንና የፈተናውን ውጤትም በግል ስልኩ እንዲያውቅ እንደሚደረግ ተናግረዋል፡፡

ተፈታኞች በፈተና አሰጣጡ ላይ ቅሬታ ካላቸውም የቅሬታ ፎርም ሞልተው ቅሬታቸው በካሜራ ታግዞ ማጣራት ከተደረገ በኋላ አፋጣኝ ምላሽ እደሚሰጣቸው ጠቁመዋል፡፡

በተዘረጋው ዲጂታላይዝ ስርዓትም ቀልጣፋና ፍትሃዊ አገልግሎት ከመስጠት ባለፈ የሚስተዋሉ ህገ ወጥ አሰራሮችን መቅረፍ መቻሉንም ጠቅሰዋል፡፡

 

በመላኩ ገድፍ

You might also like

Leave A Reply

Your email address will not be published.