Fana: At a Speed of Life!

በመኸር እርሻ እስካሁን 13 ነጥብ 1 ሚሊየን ሔክታር በዘር ተሸፈነ

አዲስ አበባ፣ ነሐሴ 3፣ 2015 (ኤፍ ቢ ሲ) በመኸር ወቅት እርሻ እስካሁን 13 ነጥብ 1 ሚሊየን ሔክታር በዘር መሸፈኑን የግብርና ሚኒስቴር አስታውቋል፡፡

በመኸር እርሻ እስከ ነሐሴ 2 ቀን 2015 ዓ.ም በአማራ፣ ኦሮሚያ፣ ደቡብ፣ ቤኒሻንጉል ጉሙዝ፣ ጋምቤላ፣ አፋር፣ ሶማሌ፣ ሲዳማ፣ ሐረሪ ክልሎችና ድሬዳዋ ከተማ አስተዳደር 17 ሚሊየን 390 ሺህ 818 ሄክታር በላይ መሬት ለማረስ ታቅዶ እንደነበር ተጠቁሟል፡፡

እስካሁንም በባህላዊ 12 ሚሊየን 844 ሺህ 743 ሄክታር እና በትራክተር ደግሞ 3 ሚሊየን 694 ሺህ ሔክታር በላይ በአጠቃላይ 16 ነጥብ 5 ሚሊየን ሔክታር በላይ መሬት መታረሱ ተገልጿል፡፡

አሁን ላይም 13 ሚሊየን 193 ሺህ 219 ሔክታር መሬት በዘር የተሸፈነ ሲሆን÷ ከዚህ ውስጥም 6 ሚሊየን 819 ሺህ 674 ሔክታሩ በክላስተር የተዘራ ነው ተብሏል፡፡

በሌላ በኩል በበልግ እርሻ በአማራ፣ ኦሮሚያ፣ ሲዳማ፣ ደቡብ እና ደቡብ ምዕራብ ክልሎች እስከ ነሐሴ 2 ቀን 2015 ዓ.ም ድረስ በስንዴ 365 ሺህ 625 ሔክታር ፣ በበቆሎ 1 ሚሊየን 15 ሺህ ሔክታር በላይ እና በገብስ 281 ሺህ 595 ሔክታር መሬት በዘር ተሸፍኗል፡፡

በተመሳሳይ በማሽላ 157 ሺህ 43 ሔክታር እና በሌሎች ሰብሎች 872 ሺህ 362 ሔክታር በድምሩ 2 ሚሊየን 691 ሺህ 758 ሔክታር መሬት በዘር መሸፈኑ ተጠቅሷል፡፡

1 ሚሊየን 498 ሺህ 597 ሔክታር መሬት ተሰብስቦም 25 ሚሊየን 994 ሺህ 196 ኩንታል ምርት መገኘቱን የሚኒስቴሩ መረጃ ያመላክታል፡፡

You might also like

Leave A Reply

Your email address will not be published.