Fana: At a Speed of Life!

የካንሠር ሕክምና ተደራሽነትን ለማሳደግ እየተሠራ ነው

አዲስ አበባ፣ ነሐሴ 4፣ 2015 (ኤፍ ቢ ሲ) የካንሠር ሕክምና አገልግሎትን በማሳደግ ሕክምናውን ተደራሽ ለማድረግ እየተሠራ መሆኑን ጤና ሚኒስቴር አስታወቀ፡፡

በኢትዮጵያ በየዓመቱ ከሚመዘገበው 77 ሺህ አዳዲስ የካንሠር ታማሚ ሕክምና እያገኙ ያሉት ከ15 በመቶ በታች ናቸው፡፡

ሕክምና የሚያገኙትን ወገኖች ቁጥር ለማሳደግ መልክዓ-ምድር እና የሕዝብ አሰፋፈርን ታሳቢ በማድረግ ስድስት ”ሁለንተናዊ የካንሠር ሕክምና ማዕከላት” እየተገነቡ መሆኑ ተገልጿል፡፡

ግንባታው እየተከናወነ ያለውም÷ በአዲስ አበባ፣ መቀሌ፣ ጎንደር፣ ጅማ፣ ሐዋሳ እና ሐረር ከተሞች መሆኑን በሚኒስቴሩ የካንሠር መከላከልና መቆጣጠር አማካሪ ዶ/ር ኩኑዝ አብደላ ለፋና ብሮድካስቲንግ ኮርፖሬት ገልጸዋል፡፡

ከስድስቱ ማዕከላትም ሁለቱ በአዲስ አበባ ጥቁር አንበሳ እና ቅዱስ ጳውሎስ ሆስፒታል እንደሚገኙ ጠቁመዋል፡፡

የካንሠር ሕክምና መስጫ ማዕከላት ማስፋፊያ ዓላማ ከህመሙ ሥርጭት አኳያ አገልግሎቱን በቅርበት ለመስጠትና ተደራሽ ለመሆን ነው ብለዋል፡፡

እስካሁን ባለው ሂደትም ጥቁር አንበሳ፣ ጅማ እና ሐረር የሚገኙት ማዕከላት ጨረርን ጨምሮ ሙሉ በሙሉ የካንሠር ሕክምና አገልግሎት እየሰጡ ስለመሆኑ አረጋግጠዋል፡፡

እንዲሁም በሐዋሳ ያለው ማዕከል ግንባታ ተጠናቅቆ የማሽን ተከላ ሥራ እየተከናወነ መሆኑን ጠቅሰው÷ ከሁለት ወራት ባነሰ ጊዜ ውስጥ ለአገልግሎት ክፍት እንደሚሆን አመላክተዋል፡፡

በጎንደር የሚገነባው ማዕከል አፈጻጸምም ከ95 በመቶ በላይ መድረሱን ጠቅሰው፥ የማጠናቀቂያ ሥራ እየተሠራ ነው ብለዋል፡፡
በነበረው ወቅታ ሁኔታ ተቋርጦ የነበረው የመቀሌ የካንሠር ሕክምና ማዕከል ግንባታ ዳግም ተጀምሮ በጥሩ ሁኔታ ላይ እንደሚገኝ ነው የገለጹት፡፡

ማዕከላቱ ተጠናቅቀው አገልግሎት ሲጀምሩ ከ15 በመቶ በታች የሆነውን የተደራሽነት ችግር ለማሳደግ ያግዛሉ ብለዋል፡፡

ከሕክምናው ሽፋን ማደግ በተጨማሪ ወረፋ ለመጠበቅ የሚደርሰውን እንግልት እና ጊዜ እንደሚቀንሱም ጠቁመዋል፡፡

በካንሠር ሕክምና ከፍተኛውን ድርሻ የሚይዘው የጡት ካንሠር መሆኑን የገለጹት ዶ/ር ኩኑዝ÷ ለጡት ካንሠር የሚሰጠው መድኃኒት ተኮር የሕክምና አገልግሎት ከ20 በላይ በሆኑ ሆስፒታሎች እየተሰጠ መሆኑን አብራርተዋል፡፡

በዮሐንስ ደርበው

ወቅታዊ፣ትኩስ እና የተሟሉ መረጃዎችን ለማግኘት፡-

ድረ ገጽ፦ https://www.fanabc.com/
ፌስቡክ፡- https://www.facebook.com/fanabroadcasting
ዩትዩብ፦ https://www.youtube.com/c/fanabroadcastingcorporate/
ቴሌግራም፦ https://t.me/fanatelevision
ትዊተር፦ https://twitter.com/fanatelevision በመወዳጀት ይከታተሉን፡፡
ኢንስታግራም፦ https://www.instagram.com/fana_television/
ቲክቶክ፦ https://www.tiktok.com/@fana_television

ዘወትር፦ ከእኛ ጋር ስላሉ እናመሰግናለን!

You might also like

Leave A Reply

Your email address will not be published.