Fana: At a Speed of Life!

ለ3ኛው የቴሌኮም ኦፕሬተር በ2016 ዓ.ም የመጀመሪያው ስድስት ወራት ፈቃድ ለመስጠት ታቅዷል

አዲስ አበባ፣ ነሐሴ 4፣ 2015 (ኤፍ ቢ ሲ) ለሦስተኛው የቴሌኮም ኦፕሬተር በ2016 ዓ.ም የመጀመሪያው ስድስት ወራት ፈቃድ ለመስጠት መታቀዱን የኢትዮጵያ ኮሙኒኬሽን ባለሥልጣን ገለጸ።

በኢትዮጵያ በቅርቡ ገቢራዊ በተደረገው ከሀገር በቀል የምጣኔ ኃብት ማሻሻያ አንዱ በመንግሥት ብቻ ሲቀርብ የነበረውን የቴሌኮም አገልግሎት በማሻሻል ለዓለም አቀፍ አቅራቢዎች ክፍት ማድረግ ነው።

ይህንንም ተከትሎ ለሁለት አዳዲስ የቴሌኮም ተቋማት ፈቃድ ለመስጠት ቀደም ሲል ጨረታ ወጥቶ በኬንያው ሳፋሪኮም የተመራው ጥምረት በ2013 ዓ.ም የመጀመሪያውን ፈቃድ መውሰዱ ይታወሳል።

በጨረታው ላይ ተሳትፎ የነበረው ኤም ቲ ኤን ግሩፕ በወቅቱ አቅርቦት የነበረው ገንዘብ ከሳፋሪኮም አንጻር ልዩነቱ በመስፋቱ የሁለተኛው ፈቃድ ሳይሰጥ መቅረቱንም ነው የባለሥልጣኑ መረጃ የሚያሳየው።

አሁን ላይ ደግሞ ሦስተኛው የቴሌኮም ኦፕሬተር በምን መልኩ መንቀሳቀስ አለበት የሚለውን ለመወሰን ከሚመለከታቸው አካላት ጋር ውይይት ተደርጎ አስፈላጊው ዝግጅት መደረጉ የኢትዮጵያ ኮሙኒኬሽን ባለሥልጣን ዋና ዳይሬክተር ባልቻ ሬባ (ኢ/ር) ገልጸዋል።

በዚህ መሰረት በኢትዮጵያ ለሦስተኛው የቴሌኮም አገልግሎት ሰጪ ተቋም ፈቃድ ለመስጠት የብቃት መጠየቂያ ሰነድ መውጣቱን ተናግረዋል።

በኢትዮጵያ በቴሌኮም ዘርፍ ለመሰማራት ፍላጎት ያላቸው ኩባንያዎች ይህንን የብቃት መጠየቂያ ሰነድ ሞልተው እስከ መስከረም 5 ቀን 2016 ዓ.ም እንዲያስገቡ ቀነ ገደብ መቀመጡንም ነው ያነሱት።

ከዚህ በኋላ በሂደቱ የተለዩት ኩባንያዎች የሃሳብ እቅድ እንዲያስገቡ ከተደረጉ በኋላ በመጨረሻም ሦስተኛው የቴሌኮም ኦፕሬተር እንደሚለይ ጠቁመዋል።

የቴሌኮም ዘርፉ ክፍት መደረጉ በአገልግሎት አሰጣጥ ጥራት፣ በዋጋ ተመጣጣኝነት እንዲሁም በተደራሽነት በኩል ጉልህ አስተዋጽዖ እንዳለውም ነው ዳይሬክተሩ ያብራሩት።

የቁጥጥር ማዕቀፉ የኢትዮጵያን ደኅንነት ባስጠበቀ መልኩ የሚተገበር መሆኑን መግለጻቸውን ኢዜአ ዘግቧል።

You might also like

Leave A Reply

Your email address will not be published.