Fana: At a Speed of Life!

በደቡብ ክልል በ43 ወረዳዎች ኮሌራ ተከስቷል

አዲስ አበባ፣ ነሐሴ 4፣ 2015 (ኤፍ ቢ ሲ) በደቡብ ክልል በሚገኙ 43 ወረዳዎች ኮሌራ መከሰቱን የክልሉ የህብረተሰብ ጤና ኢንስቲትዩት ገለጸ፡፡

ከፋና ብሮድካስቲንግ ጋር ቆይታ ያደረጉት የክልሉ የህብረተሰብ ጤና ኢንስቲትዩት ዋና ዳይሬክተር አቶ ማሙሽ ሁሴን እንደተናገሩት፤ በበሽታው የ60 ሰዎች ህይወት አልፏል፡፡

በተጨማሪም 244 ሰዎች በበሽታው የተያዙ ሲሆን፥ የንጹህ መጠጥ ውሃ አቅርቦት በሚፈለገው ሁኔታ አለመኖር እና የመጸዳጃ ቤት እጥረት ለበሽታው መስፋፋት ምክንያት መሆናቸውን አንስተዋል።

በሽታው ከዚህ የከፋ ጉዳት እንዳያደርስም የወረርሽኝ ግብረ ሃይል በማቋቋም ወደ ስራ በመግባት ውጤት ተመዝግቧል ነው ያሉት።

በክልሉ 56 የኮሌራ ህክምና ማዕከላትን በማቋቋም 5 ሺህ 83 ሰዎች ህክምናውን አግኝተው ወደቤታቸው እንደተመለሱም ነው የተናገሩት።

እስካሁን ድረስም በሁለት ዙር ለ2 ነጥብ 3 ሚሊየን ሰዎች የኮሌራ ክትባት መሰጠቱን የገለጹት አቶ ማሙሽ ፥ በአሁኑ ወቅት 12 ወረዳዎች ከበሽታው ነጻ ሆነዋል ብለዋል፡፡

አሁን ላይም የውሃ ማከሚያ ኬሚካል (ውሃ አጋርን) ቤት ለቤት የማደል ስራ እየተሰራ እንደሚገኝም ነው የገለጹት።

በሽታውን ለመቆጣጠርም ህብረተሰቡ ጥንቃቄ ማድረግ እንደሚገባው ነው መልዕክታቸውን ያስተላለፉት።

በመሳፍንት እያዩ

You might also like

Leave A Reply

Your email address will not be published.