Fana: At a Speed of Life!

ዘራፊው ሃይል ያወደማቸውን መሰረተ ልማቶች በመጠገን ወደ ስራ ለማስገባት እየተሰራ ነው – ለገሰ ቱሉ (ዶ/ር)

 

አዲስ አበባ፣ ነሐሴ 5፣ 2015 ኤፍ ቢ ሲ) በአማራ ክልል ተፈጥሮ በነበረው የጸጥታ ችግር ዘራፊው ሃይል ያወደማቸውን መሰረተ ልማቶች በመጠገን ወደ ስራ ለማስገባት ርብርብ እየተደረገ ነው ሲሉ የመንግስት ኮሙኒኬሽን አገልግሎት ሚኒስትር ለገሰ ቱሉ (ዶ/ር) ገለጹ።

በወቅታዊ ሁኔታ ዙሪያ በመንግስት ኮሙኒኬሽን አገልግሎት መግለጫ ተሰጥቷል።

በመግለጫው ላይ ሚኒስትሩ እንዳመለከቱት፤ ባህር ዳር እና ጎንደር የነበሩ የውጭ እና የሀገር ውስጥ ጎብኚዎች ጋር ውይይት በማድረግ ወደሚፈልጉበት ቦታ እንዲሄዱ እና የጉብኝት ጊዜያቸውን ያላጠናቀቁ እንዲያጠናቅቁ ለማግባባት ተሞክሯል።

ከድምሰሳው የተረፈው የዘራፊው ቡድን በአንዳንድ አካባቢዎች ራሱን ለመደበቅ ወደ ሃይማኖት እና የቅርስ ቦታዎች መግባቱን ገልጸዋል።

ለዚህም ባዘጋጃቸው ሚዲያዎች መከላከያ ሰራዊት ቅርስ እያወደመና ህዝብ እየጨፈጨፈ ነው በማለት የሃሰት መረጃ በማሰራጨት ህዝብን ለማወናበድ መሞከሩን ጠቁመዋል።

ይህም እውነታውን በሚያውቀው ህዝብ እና በሰራዊቱ ጥበብ የተሞላበት አካሄድ ከሽፏል ብለዋል፡፡

ዘራፊው እና ፅንፈኛው ቡድን በአማራ ክልል የመንግስት መዋቅርን በማፍረስ የዝርፊያ አላማውን ለማሳካት አልሞ የተነሳ ነበር ይህንም ለማሳካት በክልሉ በዋና ዋና ከተሞች ሁከት እንዲፈጠር አድርጓል ሲሉ ገልጸዋል፡፡

ሁኔታውን ከቁጥር ውጭ በመውጣቱ መንግስት የአስቸኳይ ጊዜ አዋጅ በማወጅና የአስቸኳይ ጊዜ ጠቅላይ መምሪያ ዕዝ በማቋቋም ከተሞች ወደለየለት ጥፋት እንዳያመሩ መከላከል መቻሉን ተናግረዋል።

መንግስት ለሰላም አማራጭ ከሚገባው በላይ እድል መስጠቱን እና ቡድኑን ወደ ሰላማዊ ሁኔታ ለመመለስ የሃይማኖት አባቶች እና የሀገር ሽማግሌዎች ሙከራ ማድረጋቸውን አስታውሰዋል።

ቡድኑ ግን የመንግስትን ልመና እንደ አቅም ማነስና ሽንፈት ቆጥሮ በእኩይ ተግባሩ በመቀጠሉ መንግስት በሃይል ህግ እንዲያስረክብ እና ሃይል በብቸኝነት የመጠቀም መብቱን እንዲያከብር ተገዷል ብለዋል፡፡

የቡድን ተግባር ከአማራ ክልል ጥያቄ ጋር የተገናኘ አይደለም ያሉት ሚኒስትሩ፤ የሁሉንም አካባቢዎች ጥያቄ ለመመለስ የምክክር ኮሚሽን ተደራጅቶ እየሰራ እንደሚገኝ አስታውሰዋል።

መላው ህዝብ ክልሉ ወደ ቀደመ ሰላሙ እንዲመለስ እና የአማራ ክልል አርሶ አደር የመኸር አዝመራው ላይ ትኩረቱን እንዲያደርግ የአካባቢውን ሰላም ከመጠበቅ ጀምሮ የፀጥታ አካላቱ ለሚያደጉት ርብርብ አስፈላጊውን ድጋፍ እንዲያደርግም ጥሪ አቅርበዋል፡፡

You might also like

Leave A Reply

Your email address will not be published.