Fana: At a Speed of Life!

ሁለንተናዊ የጤና አገልግሎትን ለማሻሻል እየተከናወኑ ያሉ ተግባራት ተጠናክረው ይቀጥላሉ – ዶ/ር ሊያ ታደሰ

አዲስ አበባ፣ ነሐሴ 7፣ 2015 (ኤፍ ቢ ሲ) የሀገሪቱን ሁለንተናዊ የጤና አገልግሎት ለማሻሻል እየተከናወኑ ያሉ ተግባራት ተጠናክረው እንደሚቀጥሉ የጤና ሚኒስትር ዶክተር ሊያ ታደሰ ገለጹ።

ሚኒስትሯ በአዲስ አበባ የሚገነባውን የባዮ ባንክና የላቦራቶሪ የጥራት ማረጋገጫ ናሙናዎች ማምረቻ ማዕከል ግንባታን ዛሬ በይፋ አስጀምረዋል።

ዶክተር ሊያ ታደሰ በዚሁ ጊዜ እንደገለጹት÷ ማዕከሉ የመንግሥትና የግል ጤና ተቋማት የላቦራቶሪ የጥራት ደረጃ ፍተሻዎችን በአገር ውስጥ እንዲያገኙ ያስችላል።

የበሽታዎች ቅኝት በማድረግ በወረርሽኝ መልክ ለሚከሰቱ የጤና አደጋዎች ተገቢውን ምላሽ ለመሥጠት ላቦራቶሪው የሚሰጣቸው መረጃዎች መሳኝ መሆናቸውን ገልጸዋል።

እስካሁን የጥራት ናሙናዎች ከዓለም አቀፍ ኩባንያዎች በግዥ እንደሚገኝ ገልጸው÷ ይህም የላቦራቶሪ አገልግሎቱ ሥርዓቱ የተሟላ እንዳይሆን አድርጎት ቆይቷል ብለዋል።

ከዚህ በተጨማሪም ኢትዮጵያን ለከፍተኛ የውጭ ምንዛሬ ወጪ ሲዳርግ እንደቆየ መናገራቸውን ኢዜአ ዘግቧል፡፡

ዛሬ ግንባታው የተጀመረው ማዕከል ወደ ሥራ ሲገባ እነዚህን ችግሮች በመቅረፍ የሀሪቱን የላቦራቶሪ አገልግሎት አሰጣጥ ወደ ላቀ ደረጃ ያሸጋግረዋል ነው ያሉት ።

የማዕከሉ ግንባታ በ885 ሚሊየን ብር ወጪ የሚከናወን ሲሆን÷ ወጪው በኢትዮጵያ መንግሥትና በዓለም ባንክ ይሸፈናል ተብሏል።

በሌላ በኩል ዶክተር ሊያ ታደሰ በአዲስ አበባ ልደታ ክፍለ ከተማ ወረዳ አምስት ተገኝተው የክረምት በጎ ፈቃድ የቤት እድሳት መርኃ -ግብርን አስጀምረዋል።

ዶክተር ሊያ በዚሁ ጊዜ እንደገለጹት በበጎ ፈቃድ አገልግሎት ጭምር መሥራት ካልተቻለ በመደበኛ ሥራ ብቻ ከሚፈለገው ግብ በሚፈለገው ሰዓት መድረስ አይቻልም።

የኑሮ ደረጃ ላይ የሚገኙ የማኅበረሰብ ክፍሎችን ለማገዝ የሚያከናወኑ የበጎ ፈቃድ ተግባራት ተጠናክረው እንደሚቀጥሉም ተናግረዋል፡፡

የጤና ሚኒስቴር ከተጠሪ ተቋማት ጋር በመተባበር 26 የአረጋውያንና የአቅመ ደካማ ዜጎች ቤቶችን እንደሚያድስ ተመላክቷል፡፡

You might also like

Leave A Reply

Your email address will not be published.