Fana: At a Speed of Life!

በአማራ ክልል የተፈጠረውን ሰላም ማስጠበቅ የሁላችንም ኃላፊነት ሊሆን ይገባል -የባህርዳር ከተማ ነዋሪዎች

አዲስ አበባ፣ ነሐሴ 8፣ 2015 (ኤፍ ቢ ሲ) በአማራ ክልል የተፈጠረውን ሰላም በማስጠበቅ የልማት ሥራዎችን አጠናክሮ መቀጠል የሁላችንም ኃላፊነት ሊሆን ይገባል ሲሉ የባህርዳር ከተማ ነዋሪዎች ተናገሩ።

በአማራ ክልል የተለያዩ ከተሞች አጋጥሞ የነበረው የጸጥታ ችግር በሀገር መከላከያና በነዋሪዎች የጋራ ጥረት ሰላምና መረጋጋት በመፈጠሩ የአገልግሎትና የንግድ ተቋማት መደበኛ ሥራቸውን ጀምረዋል።

በክልሉ ዋና ከተማ ባህርዳር የነበረው የጸጥታ ችግርም በመፈታቱ በተፈጠረው ሰላምና መረጋጋት ሰላማዊ እንቅስቃሴ ተጀምሯል።

በዛሬው ዕለትም የባህርዳር ከተማ ነዋሪዎች በወቅታዊ የክልሉ የጸጥታ ጉዳይ ላይ ውይይት አካሂደዋል።

በክልሉ ያጋጠመውን የሰላም መደፍረስ የሃይማኖት አባቶች፣ የሀገር ሽማግሌዎች እንዲሁም አጠቃላይ ሕብረተሰቡ በመነጋገርና በመመካከር በዘላቂነት መፍታት እንዳለባቸው በውይይቱ አንስተዋል።

በኅብረተሰቡ የሚነሱ መሠረታዊ ጥያቄዎችን በማጤን መንግሥት በሒደት መፍታት እንዳለበትም በመድረኩ ተጠቅሷል።

በክልሉ የተፈጠረውን ሰላም በማስጠበቅ የልማት ሥራዎችን አጠናክሮ መቀጠል የሁላችንም ኃላፊነት ሊሆን ይገባል ሲሉም ተናግረዋል።

የባህርዳር ከተማ ተቀዳሚ ምክትል ከንቲባ ድረስ ሳህሉ (ዶ/ር)÷ የሚፈጠሩ ማናቸውንም ችግሮች በውይይት መፍታት እየተቻለ በኃይል ለማስፈጸም የሚደረግ ጥረት ሀገርና ሕዝብን ከመጉዳት ባለፈ የሚያመጣው ውጤት እንደማይኖር ገልፀዋል።

የሀገር መከታና የሕዝብ አለኝታ የሆነውን የሀገር መከላከያ ሠራዊት መውጋት በየትኛውም መልኩ የማይገባና የሚወገዝ ድርጊት መሆኑን ተናግረዋል።

የሕዝብ ጥያቄዎች የሚፈቱት በውይይትና በንግግር መሆኑን የጠቀሱት ተቀዳሚ ምክትል ከንቲባው÷ ከግጭት ማትረፍ የሚሹ አካላትን እኩይ ዓላማ በጋራ መታገል ይገባል ብለዋል።

የክልሉ የብልፅግና ፓርቲ ቅርንጫፍ ጽህፈት ቤት ኃላፊ ይርጋ ሲሳይ በበኩላቸው÷ የአማራ ክልል ሕዝብ የጦርነትን ጉዳትና አውዳሚነት ጠንቅቆ የሚረዳ በመሆኑ ለሰላምና ልማት አበክሮ የሚሰራ መሆኑን ገልፀዋል።

ከዚህ በተቃራኒ የሚንቀሳቀሱ የጥፋት ቡድኖች ግን ክልሉን የጦርነት አውድማ ለማድረግ እየሰሩ መሆኑን ጠቅሰው÷ ዓላማቸውን ለማክሸፍ ሕዝቡ ከጸጥታ ኃይሉ ጋር የትብብር ሥራውን አጠናክሮ መቀጠል አለበት ነው ያሉት።

በአማራ ክልል በምክትል ርዕሰ መስተዳደር ማዕረግ የአስተዳደር ጉዳዮች ክላስተር አስተባባሪ ሰማ ጥሩነህ (ዶ/ር)÷ የአማራ ክልል ሕዝብ በሠራዊቱ ላይ ጥርጣሬ እንዲያድርበት የሚደረጉ ጥረቶች የፈጠራና የሐሰት መረጃዎች መሆናቸውን ሁላችንም ልንገነዘብ ይገባል ብለዋል።

በመሆኑም በክልሉ ዘላቂ ሰላምና መረጋጋት ለመፍጠር ሕግ በማስከበር ላይ የሚገኘውን የሀገር መከላከያ ሠራዊት ልናግዝና ልንደግፍ ይገባል ማለታቸውን ኢዜአ ዘግቧል፡፡

በየትኛውም መልኩ የሚነሱ ጥያቄዎችን በሀሳብ የበላይነት፣ በውይይትና በንግግር ለመፍታት እንዘጋጅ ሲሉም አሳስበዋል።

You might also like

Leave A Reply

Your email address will not be published.