Fana: At a Speed of Life!

አቶ ደመቀ መኮንን መቀመጫቸውን አዲስ አበባ ላደረጉ ዲፕሎማቶች በወቅታዊ ጉዳይ ላይ ገለጻ አደረጉ

 

አዲስ አበባ፣ ነሐሴ 9፣ 2015 (ኤፍ ቢ ሲ)ምክትል ጠቅላይ ሚኒስትርና የውጭ ጉዳይ ሚኒስትር ደመቀ መኮንን መቀመጫቸውን አዲስ አበባ ላደረጉ አምባሳደሮች፣ ዲፕሎማቶችና የዓለም አቀፍ ድርጅቶች ኃላፊዎች በወቅታዊ ጉዳዮች ዙሪያ ማብራሪያ ሰጥተዋል።

በአማራ ክልል በተወሰነው የአስቸኳይ ጊዜ አዋጅ አፈፃፀም ሂደት በዋነኝነት ህግ ማስከበር የክልሉን ሰላም መመለስ ላይ ያተኮረ መሆኑን አቶ ደመቀ መኮንን ገልጸዋል።

ችግሮቹን በውይይት ለመፍታት እስካሁን የተሰሩ ስራዎች ዙሪያም ለተሳታፊዎች ማብራሪያ ሰጥተዋል።

በአማራ ክልል ከሰሞኑ የተከሰተውን ግጭት በዘላቂነት ለመፍታት መንግስት እያደረገ ያለውን ጥረት የተመለከተ ገለፃም ተደርጓል።

በተለይም ከተለያዩ የህብረተሰብ ተወካዮች ጋር ውይይት በማድረግ መሰረታዊ አገልግሎቶች እንዲጀመሩ፣ ንፁሃን ዜጎች ከአደጋ አንዲጠበቁና በክልሉ ህግ እና ስርዓት እንዲከበር እየተሰራ መሆኑን ተገልጿል።

የፍትህ ሚኒስትርና የአስቸኳይ ጊዜ ጠቅላይ መምሪያ አባል ዶክተር ጌዲዮን ጢሞቲዎስ የአስቸኳይ ጊዜ አዋጁ አፈፃፀም ሂደትና እና የተገኙ ውጤቶችን አስመልክተው ለዲፕሎማቶችና ዓለም አቀፍ ማህበረሰብ በወቅታዊ ጉዳይ ላይ ገለጻ አድርገዋል።

በአማራ ክልል በተጣለው የአስቸኳይ ጊዜ አዋጅ ባካተታቸው አንቀጾች ዙሪያ ወቅታዊ መረጃዎችንም አቅርበዋል።

በአጠቃላይ የመንግስት ፅኑ ፍላጎት በአገሪቱ እና በክልሉ ሰላምን ማረጋገጥ እንደሆነ የተገለፀ ሲሆን በውይይቱ ወቅት በቀረቡ ጥያቄዎች ዙሪያ ምላሽ እና ማብራሪያ መሰጠቱን ኢዜአ ዘግቧል።

You might also like

Leave A Reply

Your email address will not be published.