Fana: At a Speed of Life!

በኦሮሚያ ክልል ከ4 ሺህ በላይ የመምህራን መኖሪያ ቤቶችን ለመገንባት ታቅዷል

አዲስ አበባ፣ ነሐሴ 10፣ 2015 (ኤፍ ቢ ሲ) በኦሮሚያ ክልል ከ4 ሺህ 500 በላይ የመምህራን መኖሪያ ቤቶችን ለመገንባት መታቀዱን የክልሉ ትምህርት ቢሮ አስታውቋል፡፡

በቢሮው የእቅድና በጀት ዝግጅት ዳይሬክተር ሃሰን እንድሪስ እንዳሉት፥ በ2016 በጀት ዓመት የትምህርት ጥራትን ማሳደግ ላይ በልዩ ትኩረት ይሰራል፡፡

በዚህ መሰረትም ለመማር ማስተማር ሒደቱ አስፈላጊ የሆኑ ግብዓቶችን በሁሉም ደረጃ ለሚገኙ ትምህርት ቤቶች የማሟላት ስራ እየተከናወነ ነው ብለዋል፡፡

በተለይም ነባር ትምህርት ቤቶችን የማጠናከር፣ የተማሪዎች ምገባ አገልግሎትን ማስፋፋት እና የመማሪያ መጻሕፍትን ለማሟላት እንደሚሰራ ገልጸዋል።

ነባር ትምህርት ቤቶችን ከማደስ እና ከመጠገን ባለፈ ባለሃብቱን ጨምሮ በህብረተሰብ ተሳትፎ 4 ሺህ 754 ሺህ ቅድመ መደበኛ ት/ ቤቶችን ለመገንባት መታቀዱን ጠቁመዋል፡፡

በሌላ በኩል የመማር ማስተማር ሒደቱ የጀርባ አጥንት ለሆኑት መምህራን ምቹ ሁኔታ ለመፍጠር በቅንጅት እየተሰራ መሆኑን ጠቅሰው፤ በ2016 በጀት ዓመት ከ4 ሺህ 500 በላይ ለሆኑ መምህራን መኖሪያ ቤት ለመገንባት ስራ መጀመሩን ነው ያስገነዘቡት፡፡

ህብረተሰቡም የትምህርት ጥራትን ለማሳደግ በሚሰራው ስራ ላይ የበኩሉን ሚና እንዲወጣ ጥሪ አቅርበዋል፡፡

በመላኩ ገድፍ

You might also like

Leave A Reply

Your email address will not be published.