Fana: At a Speed of Life!

የትኛውም ጥያቄ ምላሽ የሚያገኘው በግጭትና ሁከት ሳይሆን ለሰላም ቅድሚያ በመስጠት ነው – ሰማ ጥሩነህ (ዶ/ር)

አዲስ አበባ፣ ነሐሴ 10፣ 2015 (ኤፍ ቢ ሲ) የትኛውም ጥያቄ ምላሽ የሚያገኘው በግጭትና ሁከት ሳይሆን ለሰላም ቅድሚያ በመስጠት ነው ሲሉ በአማራ ክልል በምክትል ርዕሰ መስተዳድር ማዕረግ የአስተዳደር ጉዳዮች ክላስተር አስተባባሪ ሰማ ጥሩነህ (ዶ/ር) ገለፁ።

ሰማ ጥሩነህ (ዶ/ር) በአማራ ክልል ያለውን አጠቃላይ የፀጥታ ሁኔታ አስመልክተው በሰጡት መግለጫ÷የተደራጁ ዘራፊ ቡድኖች በትጥቅ በመታገዝ ክልሉን የቀውስ ማዕከል ለማድረግ ተንቀሳቅሰዋል ብለዋል።

ይህም ሰብዓዊና ቁሳዊ ኪሳራ ከማስከተሉ ባለፈ መደበኛ እንቅስቃሴዎችን በማስተጓጎል በክልሉ የምጣኔ ሃብት ጉዳት አስከትሏል ነው ያሉት።

የተደራጀው ዘራፊ ቡድን አርሶ አደሩ የግብርና ስራ እያከናወነ ባለበት ወቅት ጦርነት መክፈቱ ፀረ ሕዝብነቱን በተግባር እንደሚያሳይ ጠቅሰዋል፡፡

የሀገር ሉዓላዊነት መከታ የሆነውን የመከላከያ ሰራዊት ስምና ተግባር ለማጉደፍ የሚጥሩ አካላት እንዳሉም በመግለጫቸው ጠቁመዋል፡፡

ይሁን እንጂ የመከላከያ ሰራዊት በክልሉ ሰላምና መረጋጋት እንዲፈጠር በማድረግ የሕዝብ አለኝታነቱን በተግባር አሳይቷል ብለዋል፡፡

የክልሉ ሕዝብ ከመከላከያ ሰራዊት ጋር በመተባበር ዘላቂ ሰላምና መረጋጋት እንዲሰፍን እያከናወነ ላለው ተግባር ምስጋና ማቅረባቸውን ኢዜአ ዘግቧል፡፡

በቀጣይም የክልሉ ነዋሪዎች የተፈጠረውን ሰላም ዘላቂ ለማድረግ የጀመሩትን ሰራ አጠናክረው እንዲቀጥሉ ጥሪ አቅርበዋል፡፡

የትኛውም አይነት ጥያቄ ምላሽ የሚያገኘው በግጭትና ሁከት ሳይሆን ለሰላም ቅድሚያ በመስጠት መሆኑን ገልጸው÷ የጥፋት ቡድኑ ዓላማ የክልሉን ሕዝብ ለቀውስና ችግር መዳረግ መሆኑን አብራርተዋል።

የክልሉ ነዋሪዎች በተለያዩ አሉባልታዎች ሳይደናገሩ ከመከላከያ ሰራዊት ጎን በመቆም ወንጀለኞች ተጠያቂ የማድረግ ትብብራቸውን አጠናክረው እንዲቀጥሉም ጠይቀዋል።

You might also like

Leave A Reply

Your email address will not be published.