Fana: At a Speed of Life!

የአዲሱ የ’ደቡብ ኢትዮጵያ ክልል’ እና የነባሩ ክልል መስራች ጉባኤ አርብ ይካሔዳል

አዲስ አበባ ፣ ነሐሴ 10 ፣ 2015 (ኤፍ ቢ ሲ) የአዲሱ የ’ደቡብ ኢትዮጵያ ክልል’ እና የነባሩ ክልል መስራች ጉባኤ አርብ ነሐሴ 12 ቀን 2015 ይካሔዳል።

የክልል አደረጃጀት ማስፈፀሚያ ፕሮጀክት ጽህፈት ቤት ስራ አስኪያጅ አቶ ኩታዬ ኩሲያ እንደገለጹት የፊታችን አርብ ነባሩ ክልል በአዲስ መልክ የሚደራጅበት መስራች ጉባኤ በወልቂጤ ከተማ ይካሄዳል።

አዲሱ የደቡብ ኢትዮጵያ ክልል ምስረታ ጉባኤ ደግሞ በአርባ ምንጭ ከተማ በተመሳሳይ ቀን እንደሚካሄድም ተናግረዋል።

በስድስት የክልል ማዕከላት እየተደራጀ ያለው የደቡብ ኢትዮጵያ ክልል እንዲሁም በሰባት የክልል ማእከላት እየተደራጀ ያለው የማዕከላዊ ኢትዮጵያ ክልል ሁለቱም በተመሳሳይ ቀናት ጉባኤ እንደሚያካሄዱም ነው የተናገሩት።

ከወጣው መርሐ ግብር መረዳት እንደተቻለው ነሐሴ12 ቀን የደቡብ ኢትዮጵያ ክልል ህገ-መንግስት ውይይት ተደርጎ እንደሚፀድቅ የሚጠበቅ ሲሆን፥ የማዕከላዊ ኢትዮጵያ ክልል ደግሞ የነባሩን ክልል ህገ መንግስት ማሻሻያ ያደርጋል ተብሎ ይጠበቃል።

በተመሳሳይ ነሐሴ 13  ቀን 2015 ዓ.ም በአርባምንጭ ከተማ የደቡብ ኢትዮጵያ ክልል አስፈፃሚ አካላት ስላጣንና ተግባር የሚደነግግ አዋጅ በማውጣት፥ ክልሉን የሚመሩ አካላትን ይሾማል ተብሎ እንደሚጠበቅም ነው የገለጹት።

በተጨማሪም የክልሉ ምክር ቤት ማቋቋሚያ አዋጅና የጠቅላይ ፍርድ ቤት ማቋቋምን ጨምሮ ሌሎች አዋጆችን መርምሮ ያፀድቃል ተብሎ እንደሚጠበቅም ጠቅሰዋል።

በተመሳሳይ ዜና በጉራጌ ዞን በወልቂጤ ከተማ የምስረታ ጉባኤውን እንደሚያካሂድ የሚጠበቀው የማዕላዊ ኢትዮጵያ ክልል የተለያዩ አዋጆችን ያሻሽላል ተብሏል ።

You might also like

Leave A Reply

Your email address will not be published.