Fana: At a Speed of Life!

በአስቸኳይ ጊዜ አዋጁ የመጣውን ሰላም ለማስጠበቅ የጋራ ትብብርና ጥረት ሊቀጥል ይገባል – የባህርዳር ከተማ ተቀዳሚ ምክትል ከንቲባ

አዲስ አበባ ፣ ነሐሴ 10 ፣ 2015 (ኤፍ ቢ ሲ) በአስቸኳይ ጊዜ አዋጁ የመጣውን ሰላም በዘላቂነት ለማስጠበቅ የሁላችንም የጋራ ትብብርና ጥረት ሊቀጥል ይገባል ሲሉ የባህርዳር ከተማ ተቀዳሚ ምክትል ከንቲባ ድረስ ሳህሉ (ዶ/ር) ገለጹ።

 

በአማራ ክልል አጋጥሞ የነበረውን የፀጥታ ችግር በዘላቂነት ለመፍታት የሚያስችሉ የምክክር መድረኮች በክልሉ የተለያዩ ከተሞች ዛሬም ቀጥለው ውለዋል።

 

የምዕራብ አማራ ኮማንድ ፖስት በባህርዳር ከተማ ከሚገኙ የንግዱ ማኅበረሰብ ጋር ውይይት አድርጓል።

 

የውይይት መድረኩን የመሩት የባህርዳር ከተማ ተቀዳሚ ምክትል ከንቲባ ድረስ ሳህሉ (ዶ/ር) በክልሉ ዘላቂ ሰላም እንዲመጣ የተጀመሩ የልማት ሥራዎች ያለምንም እንቅፋት እንዲከናወኑ በትብብር መሥራት ይገባል ብለዋል።

 

የትኛውም ዓይነት ጥያቄ ምላሽ የሚያገኘው ለሰላምና ለውይይት ቅድሚያ መስጠት ሲቻል መሆኑን በመጥቀስም፥ የጥፋት ቡድኑ ዓላማ የክልሉን ሕዝብ ለቀውስና ችግር መዳረግ መሆኑን አብራርተዋል።

 

የምዕራብ አማራ ኮማንድ ፖስት ተወካይ ኮሎኔል ሽፈራው ቢሊሶ፥ በየትኛውም አካባቢ የፀጥታ ችግር ሲያጋጥም መከላከያ ግዳጁን በብቃት ይወጣል፤ በመወጣትም ላይ ይገኛል ነው ያሉት።

 

ይህ እየታወቀ ሀገር ጠባቂ ሠራዊቱን ስም ለማጠልሸት የአንድ ፓርቲ ሠራዊት አስመስሎ የሚነዛው የሐሰት ፕሮፖጋንዳ ተገቢ ባለመሆኑ ሊወገዝ ይገባል ማለታቸውን ኢዜአ ዘግቧል።

 

በየትኛውም አጋጣሚ የሚፈጠሩ ችግሮችን በውይይትና በንግግር መፍታት ተገቢ መሆኑን ገልጸው፥ የኃይል አማራጭን የሚከተሉ አካላትን ሠራዊቱ አይታገስም ሲሉም ተናግረዋል።

 

የመድረኩ ተሳታፊ ነጋዴዎችም በሁከትና ብጥብጥ የበለጠ ጥፋት እንጂ የሚመጣ መፍትሔ ባለመኖሩ ሁላችንም የሰላም ዘብ መሆን አለብን ብለዋል።

 

መንግሥትም በመልካም አስተዳደርና አገልግሎት አሰጣጥ የሚስተዋሉ ሥር የሰደዱ ችግሮችን በዘላቂነት መፍታት እንዳለበት ገልጸዋል።

 

You might also like

Leave A Reply

Your email address will not be published.