Fana: At a Speed of Life!

በድሬዳዋ ከ89 ሚሊየን ብር በላይ የሚገመት የበጎ አድራጎት ስራ በዳያስፖራው መከናወኑ ተገለጸ

አዲስ አበባ፣ ነሐሴ 11፣ 2015 (ኤፍ ቢ ሲ) በድሬዳዋ አስተዳደር በተለያዩ ማህበራዊ ዘርፎች ከ89 ሚሊየን ብር በላይ የሚገመት የበጎ አድራጎት ስራ በዳያስፖራው ማህበረሰብ መከናወኑን የድሬዳዋ ዳያስፖራ ጉዳዮች ማስተባበሪያ ጽህፈት ቤት አስታወቀ፡፡

የፅህፈት ቤቱ ኃላፊ አቶ አቤል አሸብር ለፋና ብሮድካስቲንግ ኮርፖሬት እንደገለጹት÷ በድሬዳዋ ከተማና አካባቢው በተለያዩ ማህበራዊ ዘርፎች ላይ በንቃት እየተሳተፈ የሚገኘው ዳያስፖራው በአራት ማህበራዊ ዘርፎ ላይ ትኩረት አድርጎ እየሰራ ይገኛል።

በጤናው ዘርፍ ከኩላሊት እጥበት ጋር በተያያዘ የነበረውን ችግር ለመፍታት በዳያስፖራውና ሀገር ውስጥ ባሉ ተባባሪ ድርጅቶች ተሳትፎ ወደ 20 ሚሊየን ብር በሚጠጋ ወጪ የዲያሌሲስ ማዕከል ግንባታ ተገንብቷል ብለዋል፡፡

አሜሪካና አውስትራሊያ የሚኖሩ የዳያስፖራ ኮሚኒቲዎች ባቋቋሙት ግብረ ሰናይ ድርጅት አማካኝነት 16 ሚሊየን ብር በሚጠጋ ወጪ ለአንድ ሪፈራል ሆስፒታል የሕክምና ቁሳቁስ ድጋፍ መደረጉን ጠቅሰዋል።

እንዲሁም በትምህርት ዘርፍ ባለፈው አመት ለተጀመረው የተማሪዎች ምገባ መርሐግብር በዓይነት ከተገኘው ድጋፍ በተጨማሪ ወደ 10 ሚሊየን ብር የገንዘብ ድጋፍ ከዳያስፖራው መገኘቱን ገልጸዋል።

በተለያዩ የዓለም ሀገራት የሚኖሩ የድሬዳዋ ልጆችና ወዳጆች ማህበር የዳያስፖራ ኮሚኒቲ የመማሪያ ቁሳቁሶችን በማሟላት ተማሪዎችን እስከ ዩኒቨርሲቲ ድረስ እያስተማሩ እንደሚገኙም ተናግረዋል፡፡

በተጨማሪም በፈረንሳይ የሚኖሩ የድሬዳዋ ልጆች በስፖርት ዘርፍ ከዓለም አቀፍ እግር ኳስ ማህበር (ፊፋ) ጋር በመነጋገር በ53 ትምህርት ቤቶች በፕሮጀክት ለታቀፉ 1 ሺህ 500 እግር ኳስ ተጫዋቾች የትጥቅ ድጋፍ ማድረጋቸውን አስታውሰዋል።

በአስተዳደሩ የሴቶችና ሕጻናት ቢሮ ስር ለሚገኘው የሕጻናት ማገገሚያ ማዕከል ዳያስፖራው 5 ሚሊየን ብር የሚያወጣ ቁሳቁስ፣ እንዲሁም 2 ሚሊየን ብር ጥሬ ገንዘብ ድጋፍ ማድረጉን ጠቁመዋል፡፡

የድሬዳዋ ልጆችና ወዳጆች በየዓመቱ ሐምሌ ወር ላይ ለመገናኘት ‘ናፍቆት ድሬዳዋ’ የሚል ፕሮግራም አውጥተው ማህበራዊ ድጋፍ እያደረጉ እንደሆነ ጠቅሰው፤ ይህንን ለማጠናከር እየተሰራ ነው ብለዋል፡፡

ዳያስፖራው በኢንቨስትመንት እንዲሳተፍ የሚደረገው ጥረትም ተጠናክሮ እንደሚቀጥልም ነው ሃላፊው የተናገሩት፡፡

በየሻምበል ምሕረት

 

You might also like

Leave A Reply

Your email address will not be published.