Fana: At a Speed of Life!

ጠቅላይ ሚኒስትር ዐቢይ አሕመድ (ዶ/ር) ከተባበሩት አረብ ኢሚሬቶች ፕሬዚዳንት ጋር ተወያዩ

አዲስ አበባ ፣ ነሐሴ 12 ፣ 2015 (ኤፍ ቢ ሲ) ጠቅላይ ሚኒስትር ዐቢይ አሕመድ (ዶ/ር) እና የተባበሩት አረብ ኢሚሬቶች ፕሬዚዳንት ሼክ መሀመድ ቢን ዛይድ አል ናህያን ጋር ተወያዩ።

በውይይቱ ላይ ከመሪዎቹ ጋር የልዑካን ቡድኖቻቸው ተገኝተዋል።

መሪዎቹ በኢትዮጵያ እና በተባበሩት አረብ ኢሚሬቶች መካከል ያለውን ግንኙነት ከጊዜ ወደ ጊዜ እየተጠናከረ እንደመጣ መናገራቸውን የጠቅላይ ሚኒስትር ጽህፈት ቤት መረጃ ያመላክታል።

በተለይም ለሁለቱ ህዝቦች እና ለመጪው ትውልዶቻቸው ግንኙነት ጠንካራ ድልድዮችን በበለጠ ለመገንባት ያላቸውን ቁርጠኝነትን ገልጸዋል።

የሁለትዮሽ ውይይቱን ተከትሎ ሁለቱ መሪዎች በሁለቱ ሀገራት መካከል በኢንዱስትሪ፣ በግብርና፣ በኢንቨስትመንት እና ፋይናንስን ጨምሮ በተለያዩ ዘርፎች በተደረጉ 17 ስምምነቶች የፊርማ ስነ ስርዓት ላይ ተገኝተዋል።

የውጭ ጉዳይ ሚኒስትር ዴኤታ አምባሳደር ምስጋኑ አርጋ ከውይይቱ በኋላ በሰጡት ማብራሪያ÷ በፕሬዚዳንት ደረጃ ለመጀመሪያ ጊዜ የተደረገው ይህ ጉብኝት ታሪካዊ መሆኑንና የሀገራቱ ግንኙነት በይበልጥ እንዲጠናከር መሠረት የሚጥል ነው ብለዋል፡፡

ከተባበሩት ዓረብ ኢሚሬቶች ጋር ያለን ግንኙነት ስትራቴጂክ ነው ያሉት አምባሳደሩ÷ ጉብኝቱ የሀገራቱ ግንኙነት ወደ ከፍተኛ ወዳጅነት መሸጋገሩን የሚያሳይ ስለመሆኑ አንስተዋል፡፡

የሀገራቱ ትብብሮች ዘርፈ ብዙ መሆናቸውን ያነሱት አምባሳደር ምስጋኑ÷ ዛሬ የተፈረሙት የመግባቢያ ስምምነቶችም የፖለቲካ፣ ማኅበራዊ እና ኢኮኖሚያዊ ግንኙነታችንን ወደ ላቀ ደረጃ ሊያሸጋግሩ የሚችሉ መሆናቸውን ጠቅሰዋል፡፡

የሀገራቱ ዲፕሎማሲያው ግንኙነት የረጅም ጊዜ ቢሆንም አሁን ከደረሰበት ከፍተኛ ወዳጅነት ላይ የደረሰው ግን÷ የሀገራቱ መሪዎች እና ሕዝቦች ወዳጅነት ላይ የተመሠረተ መቀራረብ ስላላቸው ነው ብለዋል፡፡

 

You might also like

Leave A Reply

Your email address will not be published.