Fana: At a Speed of Life!

በኦሮሚያ ክልል ከ7 ሚሊየን በላይ አጎበር ተሰራጭቷል

አዲስ አበባ ፣ ነሐሴ 13፣ 2015 (ኤፍ ቢ ሲ) በኦሮሚያ ክልል የወባ በሽታን መከላከል የሚያስችል ከ7 ሚሊየን በላይ አጎበር መሰራጨቱን የክልሉ ጤና ቢሮ አስታውቋል፡፡

በቢሮው የወባ በሽታ መከላከል ፕሮግራም ዳይሬክተር አቶ ጁሃር ቃሲም እንደገለጹት÷ በአሁኑ ወቅት በኦሮሚያ ክልል በተለያዩ አካባቢዎች የወባ በሽታ ስርጭት እየተስፋፋ መጥቷል፡፡

በተለይም በጅማ፣ ኢሉ አባቦር፣ ምስራቅ ሸዋ፣ ምዕራብ አርሲ፣ ምዕራብ ጉጂ እና አራቱም የወለጋ ዞኖች ላይ የበሽታው ስርጭት ከፍተኛ መሆኑን ጠቁመዋል፡፡

ክረምቱን ተከትሎ ሊከሰት የሚችልን የወባ ስርጭት ለመከላከልም ቢሮው የተለያዩ የቅድመ መከላከል ስራዎችን ሲያከናውን መቆየቱን አንስተዋል፡፡

በዚህ መሰረትም የመከላከያ መንገዶችን ግንዛቤ የማስጨበጥ እና የወባ ምርመራ ስራ መከናወኑን ነው የተናገሩት፡፡

በተጨማሪም በሽታው በሚስተዋልባቸው 182 ወረዳዎች 7 ነጥብ 1 ሚሊየን በላይ የአልጋ አጎበር መሰራጨቱን አንስተዋል፡፡

አጎበሩ 11 ሚሊየን በላይ ዜጎችን ተጠቃሚ ያደርጋል ያሉት አቶ ጁሃር÷ ሕብረተሰቡ አጎበሩን በአግባቡ አገልግሎት ላይ እንዲያውል አሳስበዋል፡፡

በሌላ በኩል በክልሉ ለወባ ተጋላጭ በሆኑ አካባቢዎች 262 ሺህ ቤቶች ላይ የኬሚካል ርጭት ስራ መከናወኑን አስረድተዋል፡፡

ህብረተሰቡ በጤና ባለሙያዎች የሚሰጡ የመከላከያ መንገዶችን በትክክል በመተግበር ከወባ በሽታ እራሱን እንዲከላከልም ጥሪ አቅርበዋል።

በመላኩ ገድፍ

You might also like

Leave A Reply

Your email address will not be published.