Fana: At a Speed of Life!

የመዋቅር ጥያቄ ምላሽ ለልማት እንጂ ለሌባ እንዳይመች ሁሉም መረባረብ አለበት –  አፈ ጉባዔ አገኘሁ ተሻገር

አዲስ አበባ፣ ነሐሴ 13፣ 2015 (ኤፍ ቢ ሲ) የመዋቅር ጥያቄ ምላሽ ለሕዝቡ ልማትና ዕድገት እንጂ ለሌባ እንዳይመች ሁሉም መረባረብ እንዳለበት የፌዴሬሸን ምክር ቤት አፈ ጉባዔ አገኘሁ ተሻገር አሳሰቡ፡፡

አፈ ጉባዔው÷ ሕገ መንግስቱ በሚፈቅደው መሠረት 6 ዞኖችና አምስት ልዩ ወረዳዎች አንድ ላይ ተደራጅተን ክልል እንሁን በማለት በመስማማታቸው የደቡብ ኢትዮጵያ ክልል ተመስርቷል ብለዋል።

ዛሬ የተካሄደው መሥራች ጉባዔም በሕገመንግስቱ ይሁንታ አግኝቶ የተፈጠረ 12ኛ ክልል መሆኑን ገልጸዋል።

ለክልሉ አዲስ በጀት ከፌደራል መንግስት የማይመደብ በመሆኑ ሰፊ የልማት ሥራዎችን በመሥራትና የገቢ ምንጮችችን በማስፋት ክልሉን በጋራ የማልማት ኃላፊነት የአመራሩና የሕዝቡ መሆኑንም ጠቁመዋል።

ከወረዳ መዋቅርነት ከፍ በማለት አሁን ወደ ዞን መዋቅር ያደጉትም የበርካታ ዘመናት ጥያቄ በትዕግስት የተመለሰበት ነው ብለዋል።

የመዋቅር ጥያቄ ምላሽ ለልማት እንጂ ለሌባ እንዳይመች ሁሉም መረባረብ አለበት ሲሉም አስገንዝበዋል።

ከዚህ በኋላ ጥያቄዎች ስለተመለሱ ወደ ልማት በመግባት የሕዝቡ ጥያቄ ምላሽ እንዲያገኝ የተመረጡ የክልሉ አመራሮች ከሕዝቡ ጋር በመሆን መሥራት አለባቸው ብለዋል።

በማቱሣላ ማቴዎስ

You might also like

Leave A Reply

Your email address will not be published.