Fana: At a Speed of Life!

በአማራ ክልል ፅንፈኛውና ዘሪፊው ቡድን ደቅኖት የነበረው አደጋ በህዝቡና በፀጥታ ኃይሎች ትብብር ሙሉ ለሙሉ ተቀልብሷል – የዕዙ አመራሮች

አዲስ አበባ፣ ነሐሴ 13፣ 2015 (ኤፍ ቢ ሲ) በአማራ ክልል ፅንፈኛውና ዘራፊው ቡድን ደቅኖት የነበረው አደጋ በክልሉ ህዝብና በፀጥታ ኃይሎች ትብብር ሙሉ ለሙሉ መቀልበሱን የአስቸኳይ ጊዜ ጠቅላይ መምሪያ ዕዝ አመራሮች ገለጹ።

የክልሉ ሕዝብ፣ የሃይማኖት አባቶችና የሀገር ሽማግሌዎች ከመከላከያ ሠራዊት ጋር በመቀናጀት ፅንፈኛውና ዘሪፊው ቡድን ደቅኖት የነበረው አደጋ እንዲቀለበስ ከፍተኛ ሚና ማበርከታቸውንም ተናግረዋል።

የክልሉ ሰላምና ፀጥታ ቢሮ ኃላፊና የጎንደር ቀጠና ኮማንድ ፖስት ምክትል ሰብሳቢ ደሳለኝ ጣሰው፣ በክልሉ በምክትል ርዕሰ መስተዳድር ማዕረግ የኢኮኖሚ ክላስተር አስተባባሪና የምስራቅ አማራ ኮማንድ ፖስት ምክትል ሰብሳቢ አብዱ ሁሴን፣ የመከላከያ ሚኒስትር ዴኤታና የማዕከላዊ ሸዋ ዞን ኮማንድ ፖስት ምክትል ሰብሳቢ ዶክተር አሕመዲን መሐመድ እንዲሁም በአማራ ክልል የብልፅግና ፓርቲ ቅርንጫፍ ፅህፈት ቤት ኃላፊና የምዕራብ አማራ ኮማንድ ፖስት አባል ይርጋ ሲሳይ ከኢዜአ ጋር ቆይታ አድርገዋል።

በቆይታቸውም በአማራ ክልል ጽንፈኛውና ዘራፊው ቡድን የመንግሥትን ሥልጣን በሃይል ለመያዝ በማለም በተለይም ታችኛውን የመንግሥት መዋቅር ለመቆጣጠር በስፋት መንቀሳቀሱን ገልጸዋል።

ያም ብቻ ሳይሆን የሀገር መከታ የሆነውን የመከላከያ ሠራዊት በማጥቃት የክልሉን ሰላም ከማወክ ባሻገር ሀገሪቱን ለውጭ ጠላት የማጋለጥ እኩይ ተግባር ውስጥ መግባቱንም ነው የተናገሩት።

ጎን ለጎንም ቡድኑ የመንግሥትና የግል ተቋማት ዝርፊያ ውስጥ መግባቱን ጠቅሰው፤ በዚህም ቡድኑ የክልሉን ማኅበራዊና ኢኮኖሚያዊ እንቅስቃሴዎች እንዲስተጓጎሉ ከማድረግ ባሻገር በርካታ ቁሳዊና ሰብዓዊ ጉዳት ማድረሱን ጠቁመዋል።

ጥያቄ አለኝ የሚል ማንኛውም አካል ጥያቄውን በሰላማዊ መልኩ ብቻ ማቅረብ እንዳለበት የገለጹት አመራሮቹ፤ ከዚህ ውጪ በሃይልና በትጥቅ የታገዘ እንቅስቃሴ ለየትኛውም አይነት ጥያቄ መፍትሄ አለመሆኑን ጠቁመዋል።

የክልሉ ሕዝብ፣ የሃይማኖት አባቶችና የአገር ሽማግሌዎች ከመከላከያ ሠራዊት ጋር በመቀናጀት ፅንፈኛውና ዘሪፊው ቡድን ደቅኖት የነበረው አደጋ እንዲቀለበስ ከፍተኛ ሚና ማበርከታቸውንም ተናግረዋል።

ይህንንም ተከትሎ በአሁኑ ወቅት ሁሉም የአማራ ክልል የኮማንድ ፖስት ቀጠናዎች ወደ ቀደመ ሰላማቸው መመለሳቸውንና ሰላማዊ የሕዝብ እንቅስቃሴም መጀመሩን ነው የተናገሩት፡፡

በክልሉ ሁሉም ቀጣናዎች የመንግሥት ተቋማት፣ ባንኮች፣ ሆቴሎች፣ ትራንስፖርት፣ የንግድ ተቋማትና ሌሌች ማኅበራዊና ኢኮኖሚያዊ የአገልግሎት ሰጪ ተቋማት ወደ መደበኛ ሥራቸው መመለሳቸውን ተናግረዋል።

በክልሉ ሰላም እንዲመለስ በማድረግ የክልሉ ሕዝብ፣ የሃይማኖት አባቶችና የሀገር ሽማግሌዎች ያደረጉት አስተዋጽዖ ከፍተኛ መሆኑን ጠቁመው፤ ለዚህም ምስጋና አቅርበዋል።

You might also like

Leave A Reply

Your email address will not be published.