Fana: At a Speed of Life!

ከ558 ሚሊየን ብር በላይ ግምታዊ ዋጋ ያላቸው የኮንትሮባንድ እቃዎች ተያዙ

አዲስ አበባ፣ ነሐሴ 15፣ 2015 (ኤፍ ቢ ሲ) ከ558 ሚሊየን ብር በላይ ግምታዊ ዋጋ ያላቸው የኮንትሮባንድ እቃዎች መያዛቸውን የጉምሩክ ኮሚሽን አስታወቀ፡፡

ኮሚሽኑ ከነሐሴ 5 እስከ ነሐሴ 11 ቀን 2015 ዓ.ም ባደረገው ክትትል 523 ነጥብ 1 ሚሊየን የገቢ የኮንትሮባንድ እቃዎች እና 35 ሚሊየን ብር የወጪ በድምሩ 558 ነጥብ 2 ሚሊየን ብር በላይ የሚያወጡ የኮንትሮባንድ እቃዎች በተለያዩ ቅርንጫፎች መያዛቸውን ገልጿል፡፡

ከተያዙት የኮንትሮባንድ እቃዎች መካከል አልባሳት፣ ነዳጅ፣ የቁም እንስሳት፣ ኤሌክትሮኒክስ፣ ቡና፣ መድሐኒት፣ ተሽከርካሪዎች፣ የመዋቢያ እቃዎች፣ የጦር መሳሪያዎች፣ ጫት፣ አደንዛዥ እጾች፣ የምግብ ዘይት እና የተለያዩ ሀገራት ገንዘቦች ይገኙበታል ተብሏል፡፡

የገቢ ኮንትሮባንድን በመቆጣጠር ረገድ አዲስ አበባ 273 ሚሊየን፣ ድሬዳዋ 113 ሚሊየን እና ጅግጅጋ 44 ሚሊየን ብር  የሚያወጡ የኮንትሮባንድ እቃዎችን መያዝ እንደቻሉ የኮሚሽኑ መረጃ ያመላክታል፡፡

ኮሚሽኑ ድርጊቱን ለመግታትና በሀገር ኢኮኖሚ የሚያሳድረውን አሉታዊ ተጽእኖ ለመከላከል ኮሚሽኑ ብቻ የሚያደርገው እንቅስቃሴ በቂ ባለመሆኑ ሁሉም ባላድርሻ አካላትና ህብረተሰቡ የበኩላቸውን ድርሻ እንዲወጡም ኮሚሽን መልዕክት አስተላልፏል፡፡

You might also like

Leave A Reply

Your email address will not be published.