Fana: At a Speed of Life!

በቤኒሻንጉል ጉሙዝ ክልል የጤና አገልግሎት ተደራሽነትን ለማሳደግ በትኩረት እየተሰራ ነው – ቢሮው

አዲስ አበባ፣ ነሐሴ 16፣ 2015 (ኤፍ ቢ ሲ) በቤኒሻንጉል ጉሙዝ ክልል የጤና አገልግሎት ተደራሽነትን ለማሳደግ በትኩረት እየተሰራ መሆኑን የክልሉ ጤና ቢሮ አስታወቀ፡፡

የቢሮው ሃላፊ አቶ ዓለም ደበሎ እንደገለጹት ÷በክልሉ ተላላፊ እና የማይተላለፉ በሽታዎችን ስርጭት ለመግታት የተለየዩ የመከላከያ ንቅናቄ ስራዎች ተከናውነዋል፡፡

በዚህ መሰረትም የካንሰር፣ ስኳር፣ ደም ግፊት፣ ቲቢ ፣ ወባ፣ ኮሌራ እና ሌሎች በሽታዎችን ለመከላከል ማህበረሰቡን ያሳተፈ ስራ መሰራቱን ተናግረዋል፡፡

ከቲቢ እና ስጋ ደዌ በሽታ ጋር በተያያዘ በክልሉ 10 ወረዳዎች 239 ሺህ በላይ ዜጎች የልየታ ስራ መከናወኑን ጠቁመው÷ በሽታው የተገኘባቸው ዜጎች ህክምና መጀመራቸውን አንስተዋል፡፡

በተመሳሳይ በክልሉ የሚስተዋለውን የወባ ስርጭት ለመግታት በርካታ የመከላከያ ስራዎች መከናወናቸውን አንስተዋል፡፡

በክልሉ 19 ወረዳዎች፣ 4 ከተማ አስተዳደሮች እና 344 ቀበሌዎች የንቅናቄ ስራ መሰራቱን ገልጸው÷ በዚህም ለወባ ትንኝ መራቢያ የሆኑ አካባቢዎችን ኬሚካል የመርጨት ስራ መሰራቱን አንስተዋል፡፡

ከዚህ ባለፈም 590 ሺህ በላይ የአልጋ አጎበር የተሰራጨ ሲሆን÷ 230 ሺህ ቤቶች ላይ የወባ መከላከያ ኬሚካል ርጭት መካሄዱንም ጠቁመዋል፡፡

በሌላ በኩል በክልሉ የኮሌራ በሽታ ምልክት ያሳዩ ሰዎችን በመለየት ሕክምና እንዲያገኙ የማድረግ ስራ እየተከናወነ መሆኑን ሃላፊው ለፋና ብሮድካስቲንግ ኮርፖሬት ተናግረዋል፡፡

በክልሉ በሁሉም አካባቢዎች ቀልጣፋ የጤና አገልግሎት ተደራሽ ለማድረግም ለሁሉም የጤና ባለሙያዎች የአቅም ግንባታ ስልጠና እየተሰጠ መሆኑን አስረድተዋል፡፡

የጤና ስርዓቱን ለማዘመንና በቴክኖሎጂ የታገዘ ለድረግም መንግስታዊና መንግስታዊ ካልሆኑ ተቋማት ጋር በትብብር እየተሰራ ነው ብለዋል፡፡

ሰዎች የበሽታዎች ምልክት ሲታይባቸው በአቅራቢያ ወደሚገኝ የጤና ተቋም መሔድ እንዳለባቸውም አስገንዝበዋል፡፡
በመላኩ ገድፍ

You might also like

Leave A Reply

Your email address will not be published.