Fana: At a Speed of Life!

በበጀት ዓመቱ 1 ሺህ 80 የመስኖ መሰረተ ልማት ግንባታ ፕሮጀክቶች ተጠናቀዋል – አይሻ መሃመድ (ኢ/ር)

አዲስ አበባ፣ ነሐሴ 18፣ 2015 (ኤፍ ቢ ሲ) በበጀት ዓመቱ 1 ሺህ 80 የመስኖ መሰረተ ልማት ግንባታ ፕሮጀክቶች መጠናቀቃቸውን የመስኖ እና ቆላማ አካባቢ ሚኒስትር ኢንጂነር አይሻ መሃመድ (ኢ/ር) ገለጹ፡፡

የመስኖ እና ቆላማ አካባቢ ሚኒስቴር የ2015 በጀት ዓመት የሴክተር ጉባዔውን በድሬዳዋ እያካሄደ ነው።

በጉባዔው ኢንጅነር አይሻ መሃመድን ጨምሮ ሚኒስትር ዴዔታዎች እና የክልሎች የመስኖና ቆላማ ቢሮ ሀላፊዎች ተገኝተዋል፡፡

ሚኒስትሯ በዚህ ወቅት እንደገለጹት÷በ2015 በጀት ዓመት 1 ሺህ 80 የመስኖ መሰረተ ልማት ግንባታ ፕሮጀክቶ የተጠናቀቁ ሲሆን 251 ሺህ 550 ሄክታር መሬት ለልማት ማዘጋጀት ተችሏል፡፡

በተጨማሪም በበጀት ዓመቱ 43 ሺህ 700 ሄክታር መሬት ማልማት የሚችሉ የመስኖ መሰረተ ልማቶች ጥገና ተከናውኗልም ነው ያሉት።

የመስኖ ልማት ስራዎችን ለማሳለጥና የቴክኖሎጂ ሽግግር ለማድረግ የሚረዱ 54 ሺህ 515 የውሃ መሳቢያ ፓምፖች ተሰራጭተዋልም ተብሏል።

በዚህም አርብቶ አደሮች እና ከፊል አርብቶ አደሮች ውሃን በመጠቀም በርካታ የልማት ስራዎችን እንዲያከናውኑ ከፍተኛ ዕገዛ አድርጓል ነው ያሉት ሚኒስትሯ።

በ2016 በጀት ዓመት በመስኖ ዘርፍ ጥራት ያላቸውና ደረጃቸውን የጠበቁ የመስኖ ጥናትና ዲዛይን ፕሮጀክቶችን ለመስራት ዕቅድ መኖሩንም ጠቁመዋል።

ግብርናን ከዝናብ ጥገኝነት በማላቀቅ የዘመነ የግብርና ዘርፍ እንዲኖር ማስቻል የተቋማቸው አንዱ ተልዕኮ መሆኑንም ሚኒስትሯ አስረድተዋል፡፡

601 የመስኖ መሠረተ ልማት ጥናትና ዲዛይን ፕሮጀክቶች በማጠናቀቅ 301 ሺህ 664 ሄክታር መሬት በመስኖ ለማልማት የሚያስችል የጥናትና ዲዛይን ሠነድ ለግንባታ ዝግጁ መደረጉንም ተናግረዋል፡፡

በቆላማና አርብቶ አደር አካባቢዎች ሲተገበሩ ከነበሩት የማህበረሰብ ንዑስ ፕሮጀክቶች ከ535 በላይ የሚሆኑትን በማጠናቀቅ ለማህበረሰቡ አገልግሎት እንዲሰጡ መደረጉን አንስተዋል፡፡

የተገኘውን ውጤት ለማስፋፋት እንዲቻል ተቋሙ ሁለተኛውን ዙር የአርብቶ አደሮች ኑሮ ማሻሻያ ፕሮጀክት በመቅረፅ ላይ ይገኛልም ነው ያሉት፡፡

ፕሮጀክቱ የሚሸፍናቸውን የወረዳዎች ብዛት ወደ 200 በማሳደግና ትኩረቱን ከድርቅና ጎርፍ ጋር በተያያዘ የሚደርሰውን አደጋ ለመቀነስ በሚያስችል መልኩ ታቅዶ እየተሰራ ነው ብለዋል፡፡

በመሳፍንት እያዩ

You might also like

Leave A Reply

Your email address will not be published.