Fana: At a Speed of Life!

በኦሮሚያ ክልል ለመኸር ሰብል ጥራቱን የጠበቀ የጸረ-አረምና ጸረ-ተባይ ኬሚካል እየተሰራጨ ነው

አዲስ አበባ፣ ነሐሴ 19፣ 2015 (ኤፍ ቢ ሲ) በኦሮሚያ ክልል ለመኸር ሰብል ጥራታቸውን የጠበቁ የጸረ-አረምና ጸረ-ተባይ ኬሚካሎች እየተሰራጩ መሆኑን የክልሉ ግብርና ቢሮ አስታወቀ፡፡

የቢሮው ምክትል ሃላፊ አቶ ደጀኔ ሒርጳ እንደገለጹት÷ አሁን ላይ የዘር ወቅት የተጠናቀቀ በመሆኑ አርሶ አደሩ የእርሻ ማሳውን መንከባከብ እና መቃኘት አለበት፡፡

በተለይም በሰብል ላይ በሚከሰት አረም ፣ ተባይ እና በሽታ ላይ አስፈላጊውን ቁጥጥር እና ክትትል ማድረግ እንደሚገባ አስገንዝበዋል፡፡

ቢሮው በመኸር ሰብል የሚከሰቱ የተለያዩ ተባዮች እና አረሞችን ለመከላከልም በቂ ዝግጅት ማድረጉን ነው የተናገሩት።

በዚህ መሰረት አርሶ አደሩ በማሳው ላይ የሚከሰትን አረም ወይም ተባይ በምን መልኩ ማስወገድ እንዳለበት የባለሙያ እገዛ እየተደረገ ነው ብለዋል፡፡

በተጨማሪም በመንግስት እና በግል ድርጅቶች ለመኸር ሰብል 3 ሚሊየን ሊትር የሚጠጋ ጥራቱን የጠበቀ ጸረ-አረምና ፀረ-ተባይ የኬሚካል አቅርቦት መኖሩን አንስተዋል፡፡

ኬሚካሉ በክልሉ ሁሉም አካባቢዎች እየተሰራጨ እንደሆነም አቶ ደጀኔ ለፋና ብሮድካስቲንግ ኮርፖሬት ተናግረዋል፡፡

በሰብል ላይ የሚከሰት አረም ፣ ተባይ እና በሽታ በምርታማነት ላይ አሉታዊ ተጽዕኖ ስለሚያሳድር አርሶ አደሩ ተገቢውን ጥንቃቄ እንዲያደርግም ጥሪ ቀርቧል፡፡

በተለይም የስንዴ ራስ አድርቅ የተሰኘው በሽታ በስንዴ ላይ ከተከሰተ ከ5 እስከ 7 ቀናት ድረስ መወገድ እንዳለበት ጠቁመው÷ ከዚህ ካለፈ ጉዳቱ የከፋ እንደሚሆን አስረድተዋል፡፡

አርሶ አደሮች ጸረ-አረምና ጸረ-ተባይ ኬሚካሎችን ከግብርና ባለሙያዎች በሚያገኙት ምክር መሰረት መጠቀም እንድለባቸው አሳስበዋል፡፡

በመላኩ ገድፍ

You might also like

Leave A Reply

Your email address will not be published.