Fana: At a Speed of Life!

በጋምቤላ ከተማ የተገነባው ኢፋ ቦሩ የሁለተኛ ደረጃ ትምህርት ቤት ተመረቀ

አዲስ አበባ፣ ነሐሴ 21፣ 2015 (ኤፍ ቢ ሲ) በኦሮሚያ ብሔራዊ ክልላዊ መንግስት ድጋፍ በጋምቤላ ከተማ የተገነባው ኢፋ ቦሩ የሁለተኛ ደረጃ ትምህርት ቤት ተመረቀ፡፡

ከ100 ሚሊየን ብር በላይ በሆነ ወጪ የተገነባውን ትምህርት ቤት የኦሮሚያ ክልል ርዕሰ መስተዳድር አቶ ሽመልስ አብዲሳ እና የጋምቤላ ክልል ርዕሰ መስተዳድር አቶ ኡሞድ ኡጁሉ መርቀው ከፍተዋል።

የትምህርት ቤቱ ግንባታ ከመማሪያ ክፍሎች በተጨማሪ የቤተ መጽሐፍት እና ቤተ-ሙከራ እንዲሁም ለአስተዳደር እና ሌሎች አገልግሎቶች የሚውሉ ሕንፃዎችን ያካተተ መሆኑን ከክልሉ ኮሙኒኬሽን ያገኘነው መረጃ ያመላክታል።

በመርሐ ግብሩ የኦሮሚያ ክልል ርዕሰ መስተዳድር አቶ ሽመልስ አብዲሳ እና የጋምቤላ ክልል ርዕሰ መስተዳድር አቶ ኡሞድ ኡጁሉን ጨምሮ ሌሎች ከፍተኛ የመንግስት የሥራ ኃላፊዎች ተገኝተዋል፡፡

የጋምቤላ ክልል ርዕሰ መስተዳድር አቶ ኡሞድ ኡጁሉ በስነ-ስርዓቱ ላይ÷በሁለቱ ህዝቦች መካከል ለዘመናት የቆየውን ግንኙነት በማጠናከር ወደ ተሻለ ደረጃ ማድረስ እንደሚያስፈልግ ተናግረዋል።

ትምህርት ቤቱ በሁለቱ ህዝቦች መካከል ያለውን የመቻቻል፣ የሰላም እና የአብሮነት እሴት ይበልጥ እንደሚያጠናክረውም ጠቅሰዋል፡፡

ግንባታው ተጠናቆ ለአገልግሎት እንዲበቃ ድጋፍ ያደረገውን የኦሮሚያ ክልልንም አቶ ኡሞድ ኡጁሉ  አመስግነዋል፡፡

የኦሮሚያ ክልል ርዕሰ መስተዳድር አቶ ሽመልስ አብዲሳ በበኩላቸው÷የትምህርት ቤቱ መገንባት የሁለቱን ክልሎች ህዝቦች ግንኙነት ይበልጥ ያጠናክራል ብለዋል።

በቀጣይም የሁለቱን ክልሎች ህዝቦች አንድነትና ወንድማማችነት በማጠናከር የኢትዮጵያን ብልጽግና ለማረጋገጥ እንደሚሰሩ አስረድተዋል፡፡

በሌላ በኩል የኦሮሚያና የጋምቤላ ክልል ርዕሳነ መስተዳድሮች እንዲሁም የሁለቱ ክልል ከፍተኛ አመራሮች በአኙዋ ብሔረሰብ ዞን በአቦቦ ወረዳ የሚገኘውን የአልዌሮ ግድብ ጎብኝተዋል፡፡

ወቅታዊ፣ትኩስ እና የተሟሉ መረጃዎችን ለማግኘት፡-
ድረ ገጽ፦ https://www.fanabc.com/
ቴሌግራም፦ https://t.me/fanatelevision
ትዊተር፦ https://twitter.com/fanatelevision በመወዳጀት ይከታተሉን፡፡
ዘወትር፦ ከእኛ ጋር ስላሉ እናመሰግናለን!
You might also like

Leave A Reply

Your email address will not be published.