Fana: At a Speed of Life!

በአማራ ክልል ለሽብር ወንጀል ሲዘጋጁ በቁጥጥር ስር ውለዋል የተባሉ 22 ተጠርጣሪዎች ተከሰሱ

አዲስ አበባ፣ ነሐሴ 23፣ 2015 (ኤፍ ቢ ሲ) በአማራ ክልል የጦር መሳሪያዎችን በመያዝ ለሽብር ወንጀል ሲዘጋጁ በቁጥጥር ስር ውለዋል የተባሉ 22 ተጠርጣሪ ግለሰቦች ላይ የሽብር ወንጀል ክስ ተመሰረተ፡፡

ክሱ የተመሰረተው በፌደራል ከፍተኛ ፍ/ቤት ልደታ ምድብ 3ኛ ፀረሽብርና የህገመንግስት ጉዳዮች ተረኛ ወንጀል ችሎት ነው።

የፌደራል ፖሊስ ኮሚሽን ወንጀል ምርመራ መምሪያ ምርመራውን በማጠናቀቅ የምርመራ መዝገቡን ለፍትሕ ሚኒስቴር የተደራጁና ድንበር ተሻጋሪ ጉዳዮች ዐቃቤ ሕግ ማስረከቡን ተከትሎ ነው ክሱ በዐቃቤ ሕግ የተመሰረተው።

ክስ ከተመሰረተባቸው ተከሳሾች መካከል የቀድሞ የአማራ ክልል ልዩ ኃይል አባል ነበሩ የተባሉት ም/አ/ አለቃ ታጠቅ ማሞ፣ ረ/ሳጅን አብርሃም ኃይለ እየሱስና ኮ/ብል ቃሉ ግዛቸው ይገኙበታል፡፡

ተከሳሾቹ በ1996 ዓ.ም የወጣውን የኢፌዴሪ የወንጀል ሕግ እንዲሁም የሽብር ወንጀልን ለመከላከልና ለመቆጣጠር የወጣውን አዋጅ በመተላለፍ በዋና ወንጀል አድራጊነት ተካፋይ በመሆን የሽብር ወንጀል ለመፈጸም መሰናዳት የሚል ክስ በተከሳሾቹ ላይ አቅርቦባቸዋል።

በቀረበው ዝርዝር ክስ ላይ እንደተገለጸው ÷ ተከሳሾቹ የፖለቲካ ርዕዮተ ዓለም ዓላማን ለማራመድ በማሰብ፣ የተወሰነ የህብረተሰብ ክፍልን ለማሸበርና መንግስትን ለማስገደድ፣ ከሌሎች ግብረ አበሮች ጋር በመመሳጠር የሽብር ዓላማቸውን ከግብ ለማድረስ ተደራጅተዋል በማለት ዐቃቤ ሕግ በክሱ ላይ ዘርዝሯል።

ከ1ኛ እስከ 15ኛ ተራ ቁጥር የተጠቀሱ ተከሳሾች 1 ዲሽቃ መሳሪያ ከ501 ጥይቶች ጋር፣ 4 እስናይፐር፣ 2 ብሬን መሳሪያ፣ ከ1 ሺህ 348 ጥይቶች ጋር፣3 ኤፍ ዋን የእጅ ቦንብ፣ 5 ክላሽ መሳሪያ፣ 2 ፋልኮን ሽጉጥ ፣ በመያዝ ሌሎቹ ማለትም ከ16ኛ እስከ 22 ተራ ቁጥር የተጠቀሱት ተከሳሾች ደግሞ ለሽብር ወንጀል ለመፈጸም ተሰናድተዋል የሚል በክሱ ዝርዝር ውስጥ ተጠቅሷል፡፡

በሰሜን ሸዋ ዞን ደ/ብርሃን 10 ኪሎ ሜትር በሚገኝ ሳሪያ ሚካኤል ቀበሌ ልዩ ቦታው ኩክ የለሽ ገዳም አካባቢ በአንድ ግለሰብ መኖሪያ ቤት ውስጥ ተቀምጠው እንደነበረ እና በዚህ ጊዜ የአካባቢ ሚኒሻዎችና የፀጥታ አካላት ለማጣራት ተከሳሾቹ ወደ ተከራዩበት ቤት ሲሄዱ ተኩስ ተከፍቶባቸው እንደነበርና በወቅቱ በአካባቢው በነበረ የመከላከያ ሰላም አስከባሪዎች በሰኔ 15 ቀን 2015 ዓ.ም በቁጥጥር መዋላቸውን በክሱ ተጠቅሷል።

ከተከሳሾቹ መካከል ከ3ኛና ከ22ኛ ተከሳሾች በስተቀር ሌሎቹ 20 ተከሳሾች ችሎት ቀርበው ክሱ እንዲደርሳቸው ተደርጓል።

ፍርድ ቤቱ የተከሳሾቹን ማንነት ያረጋገጠ ሲሆን ተከሳሾቹም የቀድሞ የአማራ ክልል ልዩ ኃይል አባል እንደነበሩ በመጥቀስ የመኖሪያ አድራሻቸውን እንዲሁም ከሰባተኛ እስከ አስረኛ ክፍል የሚደርስ የትምህርት ደረጃ እንዳላቸው ገልጸው አስመዝግበዋል።

ከጠበቃቸው ጋር ተማክረው በዋስትና ላይ ክርክር ለማድረግ በጠየቁት ተለዋጭ ቀጠሮ መሰረት ፍርድ ቤቱ በይደር ለነገ ቀጥሯል።

3ኛ እና 22 ኛ ተራ ቁጥር የተጠቀሱ ሁለት ተከሳሾችን በሚመለከት በነገው ቀጠሮ ለፖሊስ ትዕዛዝ እንደሚሰጥ ተረኛ ችሎቱ ገልጿል።

በታሪክ አዱኛ

You might also like

Leave A Reply

Your email address will not be published.