Fana: At a Speed of Life!

ከ188 ሺህ በላይ በሚሆኑ የወንጀል ምርመራ መዝገቦች ላይ ውሳኔ ተሰጥቷል – ፍትሕ ሚኒስቴር

አዲስ አበባ፣ ነሐሴ 23፣ 2015 (ኤፍ ቢ ሲ) በተጠናቀቀው በጀት ዓመት በሀገር አቀፍ ደረጃ ከ188 ሺህ በላይ በሚሆኑ የወንጀል ምርመራ መዝገቦች ላይ ውሳኔ መስጠቱን የፍትሕ ሚኒስቴር አስታወቀ።

በፍትሕ ሚኒስቴር አዘጋጅነት 4ኛው የፍትሕ ሚኒስቴር፣ የክልሎች ፍትሕ ቢሮዎችና የጠቅላይ ዐቃቤ ሕግ ተቋማት የጋራ መድረክ በአዲስ አበባ እየተካሄደ ነው።

የፍትሕ ሚኒስትር ጌዲዮን ጢሞቲዎስ (ዶ/ር) ÷ መሰረታዊ፣ የሚታይና ጉልህ ለውጥ ማምጣት አለብን በሚል አመላካች የፍትሕ ዘርፍ ማሻሻያ ፍኖተ ካርታ መዘጋጀቱን ገልጸዋል።

በፍትሕ ሚኒስቴር የስትራቴጂክ ጉዳዮች ዳይሬክተር አቶ ደሳለኝ መንግስቴ ÷ በ2015 በጀት ዓመት 198 ሺህ 439 የወንጀል ምርመራ መዝገቦች በዐቃቤ ሕግ እጅ እንደነበሩ ጠቅሰዋል።

ከእነዚህ ውስጥም ዐቃቤ ሕግ ለ188 ሺህ 875 መዝገቦች ውሳኔ በመስጠት የተሻለ አፈጻጸም ማስመዝገቡን ተናግረዋል።

በሀገር አቀፍ ደረጃ የወንጀል ክርክር ሲደረግባቸው ከነበሩ 172 ሺህ 940 የክስ መዝገቦች ውስጥ 68 ሺህ 42 መዝገቦች ላይ ፍርድ ቤት ውሳኔ እንደሰጠባቸው አስታውቀዋል።

በ64 ሺህ 624 መዝገቦች ላይም የጥፋተኝነትና የቅጣት ውሳኔ በመስጠት 3 ሺህ 418 የሚሆኑት መዝገቦች በነፃ እንዲሰናበቱ መደረጉን መግለጻቸውን ኢዜአ ዘግቧል፡፡

ዛሬን ጨምሮ ለሁለት ቀናት በሚቆየው የጋራ መድረክ የ2015 ዓ.ም በጀት ዓመት የፍትሕ ሚኒስቴር፣ የክልል ፍትሕ ቢሮዎችና የጠቅላይ ዐቃቤ ሕግ ተቋማት የአፈፃጸም ሪፖርት ቀርቦ ምክክር ተደርጎበታል።

በቀጣይም የፍትህ ዘርፍ የመሠረታዊ ለውጥ ፍኖተ ካርታ እንዲሁም የቀጣይ ሦስት ዓመታት ቁልፍ የአተገባበር መለኪያዎችና ተያያዥ ሰነዶች ቀርበው ውይይት ይደረግባቸዋል ተብሎ ይጠበቃል።

You might also like

Leave A Reply

Your email address will not be published.