Fana: At a Speed of Life!

በኢትዮጵያ ቡና ላይ እሴት ለመጨመር ከጣሊያኑ ’ኢሊካፌ’ ጋር የውል ስምምነት ተደረገ

አዲስ አበባ፣ ነሐሴ 26፣ 2015 (ኤፍ ቢ ሲ) የኢትዮጵያ ቡናና ሻይ ባለሥልጣን በቡና ላይ እሴት ለመጨመር የሚያስችል የውል ስምምነት ከጣሊያኑ ‘ኢሊካፌ’ ኩባንያ ጋር ማድረጉ ተገለጸ።

የጣሊያኑ ኩባንያ የኢትዮጵያን የቡና የጥራት ደረጃ ለማሳደግ የሚያስችል ሥልጠና ለመሥጠት መስማማቱም ነው የተገለጸው፡፡

በመሆኑም ኩባንያው የቡናን ጥራት ለመጠበቅ የሚያስችል ስልጠና አዲስ አበባ በሚገኘው ማሠልጠኛ ማዕከል እንደሚሰጥ ተነግሯል።

ስልጠናው ከቡና ማሣ ጀምሮ እስከ ተጠቃሚ ድረስ ያለውን ሂደት እንደሚያካትትም ተጠቁሟል’

የቡና ማሠልጠኛ ማዕከሉ ÷ በጣሊያኑ የትብብር ልማት ኤጀንሲ (ኤ.አይ.ሲ.ኤስ)፣ በተመድ የኢንዱስትሪ ልማት ድርጅት (ዩኒዶ)፣ በኢሊካፌ፣ በኤርኔስቶ ኢሊ ፋውንዴሽን እና በኢትዮጵያ ቡናና ሻይ ባለሥልጣን ሽርክና ዕውን መሆኑን ኮፊ ጂኦግራፊ መጋዚን ፅፏል፡፡

የሥልጠና ማዕከሉ÷ የቡና ወጪ ንግድ ደረጃን ያሟላና ዓለም አቀፍ ጥራቱን የጠበቀ ቡና ማግኘት ይቻል ዘንድ ብቁ ባለሙያዎችን ለማፍራት ይተጋል ተብሏል፡፡

“የኢትዮጵያ ቡና በዓለማችን ምርጡ የአረቢካ ቡና ነው፤ በቡናው ላይ እሴት መጨመርና በሀገሪቷ ምጣኔ ሐብት ላይ የበኩላችንን እናደርጋለን” ሲሉም ነው የኢሊካፌ ዋና ሥራ አሥፈፃሚ ክሪስቲና ስኮቺያ የተናገሩት፡፡

ከሥልጠና ይዘቶች መካከል የቡና ማሳ ክብካቤ፣ ምርት አሰባሰብና ቆልቶ ማዘጋጀት እንዲሁም የቡና ተክል ሕዋስ ባሕሪ ትንታኔ፣ ቡና ተፈልቶ ወደ ሲኒ እስከሚቀዳ ያለው ሂደት፣ ጥንቃቄ እና ትኩረት ይገኙበታል።

ኢሊካፌ በቡና ዘርፍ ከፍተኛውን የብቃት ማረጋገጫ የምሥክር ወረቀት ያገኘ ኩባንያ መሆኑ ተገልጿል።

 

You might also like

Leave A Reply

Your email address will not be published.