Fana: At a Speed of Life!

ከመደበኛው ይልቅ በመስኖ የሚለማዉ ስንዴ ከፍተኛ ውጤት እየታየበት ነው- ግብርና ሚኒስቴር

አዲስ አበባ፣ ነሐሴ 26፣ 2015 (ኤፍ ቢ ሲ) በመደበኛ መልኩ ከሚሰራዉ የስንዴ ልማት በመስኖ የሚለማዉ ስንዴ ዉጤታማ መሆኑን የግብርና ሚኒስቴር አስታወቀ።

የግብርና ሚኒስትር ዴኤታ መለስ መኮንን (ዶ/ር) እንደተናገሩት ÷ ባሳለፍነው የምርት ዘመን 53 ሚሊየን ኩንታል ለመሰብሰብ ታቅዶ በዓመቱ መጨረሻ 47 ሚሊየን ኩንታል ምርት መሰብሰብ ተችሏል።

ላለፉት 3 ዓመታት በተሰራ ስራ በ2014 ዓ.ም ከዉጭ የሚገባዉን የስንዴ ምርት በሀገር ዉስጥ ምርት መተካት ተችሏል፡፡

በዚህም ለስንዴ የሚዉለዉን 1 ቢሊየን የዉጭ ምንዛሬ ማዳን መቻሉ ተገልጿል፡፡

ቀደም ሲል በመኸር ወቅት ከ 1ነጥብ 7 ሚሊየን ሄክታር በላይ መሬት ማልማት እንደማይቻል የገለጹት ሚኒስትር ዴኤታዉ ÷በ2014 /15  ዓ/ም የምርት ዘመን በመኸር ወቅት ብቻ 2 ነጥብ 8 ሚሊየን ሄክታር መሬትን በስንዴ ምርት መሸፈን መቻሉን ገልጸዋል፡፡

በአጠቃላይ በ2014 /15 ዓ.ም በመስኖ የበልግ እና የመኸር ምርት 4 ነጥብ 47 ሚሊየን ሄክታር መሬት ተሸፍኖ በሶስቱም የምርት ወቅት ከ154 ሚሊየን ኩንታል ያላነሰ ምርት ማግኘት ተችሏል ብለዋል ።

ይህንንም በ2016 ዓ.ም ደግሞ በመስኖ የመኸር እና የበልግ ምርት ወቅት ከፍ ያለ ምርታማነትን ለማግኘት ታስቦ እየተሰራ መሆኑ ተገልጿል፡፡

በዚህ ዓመት ስንዴን ብቻ ወደ 3 ነጥብ 6 ሚሊየን ሄክታር ለመሸፈን ታቅዶ ከ 2 ነጥብ 8 ሚሊየን ሄክታር በላይ መሬት በዘር መሸፈኑን ገልጸዋል፡፡

ይኸዉም በቀጣዮቹ ጊዜያት የሚሰሩ ስራዎችን ጨምሮ ዕቅዱን ለማሳካት ስራዎች ተጠናክረዉ እንደሚቀጥሉ ተናግረዋል ።

በክልል ደረጃ የመስኖም ሆነ የበልግ እንዲሁም የመኸር ስንዴ ልማት ላይ ሰፊዉን ድርሻ ይዘው እየሰሩ ያሉት የኦሮሚያ እና አማራ ክልሎች መሆናቸዉንም ሚኒስትር ድኤታዉ ጠቁመዋል፡፡

በሌሎች አካባቢዎችም መሰረተ ልማቶችን በማስፋት እየቀጠልን ነዉ በ2016 የምርት ዘመን ለመስኖ ስንዴ የቅድመ ዝግጅት ስራ እየተሰራ እንደሚገኝም ገልፀዋል።

በፀጋዬ ወንድወሰን

You might also like

Leave A Reply

Your email address will not be published.