Fana: At a Speed of Life!

አቶ ገዱ ከቻይና የውጭ ጉዳይ ሚኒስትር ዋንግ ዩ ጋር በስልክ ተወያዩ

አዲስ አበባ ፣ ግንቦት 3 ፣ 2012 (ኤፍ ቢ ሲ) የኢፌዴሪ የውጭ ጉዳይ ሚኒስትር አቶ ገዱ አንዳርጋቸው የውጭ ጉዳይ ሚኒስትር ዋንግ ዩ ጋር በስልክ ተወያይተዋል።

ሚኒስትሮቹ በውይይታቸው የሁለቱን ሃገራት ሁሉን አቀፍ ግንኙነት ማጠናከር፣ የኮሮና ቫይረስ ወረርሽኝ ስርጭትን በትብብር ለመግታት፣ ሁለቱ ሃገራት ዲፕሎማሲያዊ ግንኙነት የጀመሩበትን 50ኛ ዓመት በደማቅ ሁኔታ ማክበር በሚችሉባቸው እና ተያያዥ ገዳዮች ዙሪያ ትኩረት አድርገው መክረዋል።

አቶ ገዱ ቻይና የኮሮና ቫይረስ ስርጭትን ለመግታት የተከተለችው ውጤታማ ስትራቴጂ ለቀረው ዓለምም መልካም ተሞክሮ በመሆኑ አድናቆታቸውን ገልጸዋል።

በኮሮና ቫይረስ ምክንያት በመላው ዓለም ለጠፋው የሰው ህይወት ሃዘናቸውን የገለጹት አቶ ገዱ፥ የኮሮና ወረርሽሽኝን ለመከላከል በሚደረገው ዘመቻ የሁሉም አካላት ትብብር ተጠናከሮ መቀጠል እንዳለበት አንስተዋል።

የቻይና የህክምና ቡድን አባላት በቅርቡ በኢትዮጵያ በመገኘት ወረርሽኙን ለመግታት ላደረጉት ድጋፍ እና የክህሎት ሽግግርም ምስጋና አቅርበዋል።

ኮቪድ 19 በአፍሪካ በተለይም በኢትዮጵያ የከፋ ጉዳት እንዳያደርስ ቻይና እያደረገች ላለው የመከላከያ ቁሳቁስ እና ሁሉን አቀፍ ድጋፍ አመስግነዋል።

የታላቁ የኢትዮጵያ ህዳሴ ግድብ ግንባታ የደረሰበትን ደረጃ እና የኢትዮጵያን አቋም በተመለከተ በሰጡት ማብራሪያም፥ ኢትዮጵያ አሁንም የሶስትዮሽ ድርድሩ ቀድሞ በተቀመጡ መርሆዎች ለአፍሪካ ችግር አፍሪካዊ መፍትሄ ሊሰጥ በሚችል መልኩ እንዲቀጥል ቢደረግ ፍቃዷመሆኑንም አብራርተዋል።

ሃገራቱ ዲፕሎማሲያዊ ግንኙነት የጀመሩበትን 50ኛ ዓመት በደማቅ ሁኔታ ለማክበር እየተደረገ ነው ያሉት አቶ ገዱ፥ ይህም የሃገራቱን ሁሉን አቀፍ ግንኙነት ይበልጥ ለማጠናከር የጎላ ሚና አለው ብለዋል።

የቻይና የውጭ ጉዳይ ሚኒስትር ዋንግ ዩ በበኩላቸው የኮቪድ 19 ወረርሽኝን ለመግታት የዓለም ጤና ድርጅት የሚሰጠውን ምክረ ሃሳብ ተግባራዊ ማድረግ ወሳኝ መሆኑን ጠቁመዋል።
የዓለም ጤና ድርጅት ወረርሽኙን ለመከላከል እያደረገ ያለውን ስራ ሁሉም አካላት ሊደግፈው ይገባልም ነው ያሉት።

ወረርሽኙ በአፍሪካ ብሎም በኢትዮጵያ የከፋ ጉዳት እንዳያደርስ ቻይና ያላትን ልምድና ተሞክሮ ማካፈሏን አጠናክራ ትቀጥላለችም ብለዋል ሚኒስትሩ።

የታላቁ የኢትዮጵያ ህዳሴ ግድብ ግንባታ ውሃ ሙሌትን በተመለከተ ሶስቱ ሃገራት በመርህ ላይ የተመሰረተ ውይይት በማድረግ መፍትሄ ማፈላለግ አለባቸው ብለው እንደሚያምኑ መናገራቸውን ከውጭ ጉዳይ ሚኒስቴር ቃል አቀባይ ፅህፈት ቤት ያገኘነው መረጃ ያመላክታል።

አያይዘውም ቻይና ሶስቱ ሃገራት ተቀራርበው ልዩነታቸውን እንዲፈቱ አስፈላጊውን ድጋፍ እንደምታደርግ አውስተዋል።

You might also like

Leave A Reply

Your email address will not be published.