Fana: At a Speed of Life!

ለውጭ ገበያ ከሚቀርብ የአቮካዶ ልማት3 ነጥብ 5 ሚሊየን ዶላር ገቢ ለማግኘት ታቅዷል-አቶ ሽመልስ አብዲሳ

 

አዲስ አበባ፣ ነሐሴ 27፣ 2015 (ኤፍ ቢ ሲ) በ2015/16 ምርት ዘመን ለውጭ ገበያ ከሚቀርብ ምርጥ ዘር የአቮካዶ ልማት 3 ነጥብ 5 ሚሊየን የአሜሪካ ዶላር ገቢ እንደሚያስገኝ ይጠበቃል ሲሉ የኦሮሚያ ክልል ርእሰ መስተዳድር ሽመልስ አብዲሳ ተናገሩ፡፡

ርእሰ መስተዳድሩ በማህበራዊ ትስስር ገፃቸው ÷ለውጭ ገበያ የሚውል የተሻሻለ የአቮካዶ ኢንሼቲቭ በ2011 ዓ.ም በአድኣ ስናውጅ 253 ሄክታር መሬትን በማልማት ነበር ብለዋል።

ከ4 ዓመት በኋላ በ2014/15 ምርት ዘመን ደግሞ ይህ የምርጥ ዘር አቮካዶ ክላስተር ልማት 16 ሺህ ሄክታር መሬት በላይ የደረሰ ሲሆን÷ በሁለት ዙር 60 ቶን ምርት ለውጭ ገበያ በማቅረብ 1 ሚሊየን የአሜሪካ ዶላር ገቢ ማስገኘት መቻሉንም ተናግረዋል፡፡

በ2015/16 ምርት ዘመን ደግሞ በተያዘው እቅድና በተጨባጭ ባለው ሁኔታ አርሶ አደሮች በክላስተር እያለሙት ከሚገኝ ለውጭ ገበያ የሚቀርብ ምርጥ ዘር የአቮካዶ ልማት 1 ሺህ ቶን ምርት ይገኛል ነው ያሉት።

በዚህ መሠረት ለመጀመርያ ጊዜ በመርከብ ለውጭ ገበያ መላክ የተጀመረ መሆኑን እና 3 ነጥብ5 ሚሊየን የአሜሪካ ዶላር ገቢ እንደሚያስገኝ ይጠበቃል ብለዋል።

በዚህ አፈጻጸም ትልቅ ስኬት የሚሆነው የውጭ ገበያ ደረጃ በተለይ የአውሮፓ ሕብረት የሚፈልገውን የምርት ጥራት ደረጃ በአርሶ አደሮች ማሟላት መቻሉ ነው ሲሉም አክለዋል።

የኦሮሚያ ክልል የክልሉን ግብርና ሽግግር ለማሳካት ከያዛቸው ግቦች መካከል አንደኛው የተለያዩ ኢኒሼቲቮች በመቅረጽ የአርሶ አደሩና አርብቶ አደሩ ኢኮኖሚ ማሳደግ መሆኑን የገለፁት አቶ ሽመልስ በዚህ በኩል ለሀገር ውስጥና ለውጭ ገበያ ተፈላጊ የሆኑ የክላስተር ልማቶች ትልቅ ሚና እየተጫወቱ ይገኛሉ ብለዋል።

ለተገኘው ስኬት ለግብርና ባለሙያዎች፣አርሶ አደሮች እና ሌሎች ባለ ድርሻ አካላት ምስጋና አቅርበዋል፡፡

You might also like

Leave A Reply

Your email address will not be published.