Fana: At a Speed of Life!

በሀገራዊ ጉዳዮች ላይ መግባባት በመፍጠር ኢትዮጵያን መገንባት አለብን – አቶ ታዬ ደንደዓ

አዲስ አበባ፣ ነሐሴ 28፣ 2015 (ኤፍ ቢ ሲ) ከልዩነት አጥር በመውጣት በወሳኝ ሀገራዊ ጉዳዮች ላይ የጋራ መግባባት በመፍጠር ኢትዮጵያን በጋራ መገንባት የሁላችንም ኃላፊነት ሊሆን ይገባል ሲሉ የሰላም ሚኒስትር ዴዔታ ታዬ ደንደዓ ገለጹ።

“ሀገራዊ ማንነት ለጠንካራ ሀገር ግንባታ” በሚል መሪ ሃሳብ በወሳኝ ሀገራዊ ጉዳዮች ላይ የጋራ መግባባት መፍጠር ዓላማ ያደረገ የፓናል ውይይት በጅግጅጋ ከተማ ተካሂዷል።

በመድረኩ ላይ በመገኘት መልዕከት ያስተላለፉት የሰላም ሚኒስትር ዴዔታ ታዬ ደንደዓ ÷ ለዜጎች ነጻነት፣ ሰላም፣ ክብርና ጥቅም መከበር ሀገር መሰረት ስለመሆኗ ጠቅሰዋል።

በዜጎችና በልሂቃን መካከል በሀገራዊ ጉዳዮች ላይ መግባባት ወሳኝ መሆኑን ጠቅሰው ÷ ከልዩነት አጥር በመውጣት በሀገራዊ ጉዳዮች ላይ የጋራ መግባባት በመፍጠር ኢትዮጵያን በጋራ መገንባት አለብን ብለዋል።

የጋራ ማንነቱን ጠንቅቆ ያልተረዳ ሕዝብ ስለ ትናንት ታሪኮቹ፣ ስለ ጋራ ጥቅሞቹ፣ ስለ መልካም እሴቶቹና ስለ ነገ ዓላማዎቹ ማወቅ ያዳግተዋልም ነው ያሉት።

ዜጎች የጥቅማቸው፣ የክብራቸውና የነጻነታቸው ዋስትና የሆነች ጠንካራ ሀገር በጋራ ለመገንባት መስራት አለባቸውም ማለታቸውን ኢዜአ ዘግቧል፡፡

በመድረኩ የተለያዩ ይዘቶችን የያዙ ጥናታዊ ጽሁፎች ቀርበው ውይይት ተደርጎባቸዋል ተብሏል።

You might also like

Leave A Reply

Your email address will not be published.