Fana: At a Speed of Life!

በኦሮሚያ ክልል ለአዲስ ዓመት በዓል አሥፈላጊ የፍጆታ ዕቃዎች በተመጣጣኝ ዋጋ እየቀረቡ ነው

አዲስ አበባ፣ ነሐሴ 29፣ 2015 (ኤፍ ቢ ሲ) በኦሮሚያ ክልል ለዘመን መለወጫ በዓል የእርድ እንስሳትን ጨምሮ አስፈላጊ የፍጆታ ዕቃዎች በተመጣጣኝ ዋጋ ለገበያ እየቀረቡ መሆኑን የክልሉ ንግድ ቢሮ አስታውቋል።

የቢሮው የገበያ ልማት ዳይሬክተር ወ/ሮ ተሊሌ ከፍታ እንደገለጹት÷ለአዲስ ዓመት በዓል የሚያስፈልጉ መሠረታዊ ፍጆታ ዕቃዎች አቅርቦት ችግር እንዳይፈጠር በቅንጅት እየተሠራ ነው፡፡

በዚህ መሠረትም በክልሉ ሁሉም ዞኖች በንግድ ሥርዓቱ የሚስተዋሉ ችግሮችን የሚቆጣጠር ኮሚቴ ተዋቅሮ ወደ ሥራ መገባቱን አንስተዋል።

ቢሮው ከኅብረት ሥራ ማኅበራት፣ ከዩኔኖች እና ከነጋዴዎች ጋር በትብብር እየሠራ መሆኑም ዳይሬክተሯ አስረድተዋል፡፡

ለዘመን መለወጫ በዓልም 9 ነጥብ 4 ሚሊየን ሊትር ዘይት እና 26 ሺህ ኩንታል በላይ ስኳር ለገበያ መቅረቡን ነው የተናገሩት፡፡

ከዚህ ባለፈም 120 ሺህ በላይ የቀንድ ከብት፣ ከ85 ሺህ በላይ በጎች እና ከ124 ሺህ በላይ ፍየሎች ለአዲሱ ዓመት ለገበያ በሁሉም የክልሉ አካባቢዎች መቅረባቸውን ጠቁመዋል፡፡

በሌላ በኩል 29 ሺህ ኩንታል ስንዴ ዱቄት፣ 15 ሺህ ኩንታል ሽንኩርት እና የ30 ሺህ ኩንታል ጤፍ አቅርቦት መኖሩን አንስተዋል፡፡

እንቁላል፣ ዶሮ እና ሌሎች ግብዓቶችንም የተለያዩ የዕሁድ ገበያ ማዕከላትን በማዘጋጀት ሸማቹ ከአርሶ አደሩ እና አምራቹ በቀጥታ እንዲገዛ እየተደረገ ነው ብለዋል፡፡

በተመሳሳይ የበዓል ገበያውን ፍላጎት መሰረትያደረገ አትክልት እና ፍራፍሬ ለማቅረብ የገበያ ትሥሥር መፈጠሩን ነው ያስረዱት፡፡

በዓላቱን ተከትሎ አላስፈላጊ የዋጋ ንረት እንዳይከሰት በሁሉም ዞኖች የተዋቀረው ኮሚቴ ጥብቅ ቁጥጥር እያደረገ መሆኑን አስረድተዋል።

ማኅበረሰቡም ለበዓላቱ በቂ አቅርቦት መኖሩን ተገንዝቦ በተረጋጋ ሁኔታ በተመጣጣኝ ዋጋ እንዲሸምት አስገንዝበዋል፡፡

በመላኩ ገድፍ

You might also like

Leave A Reply

Your email address will not be published.