Fana: At a Speed of Life!

በጳጉሜ ወር በክልሉ ያለውን አሉታዊ ድባብ መቀየር የሚያስችል የሥነ ተግባቦት ሥራ ያስፈልጋል – አቶ አረጋ ከበደ

አዲስ አበባ፣ ነሐሴ 29፣ 2015 (ኤፍ ቢ ሲ) በጳጉሜ ወር በአማራ ክልል ያለውን አሉታዊ ድባብ መቀየር የሚያስችል የሥነ ተግባቦት ሥራ ያስፈልጋል ሲሉ የክልሉ ርእሰ መስተዳድር አረጋ ከበደ ተናገሩ፡፡

ርዕሰ መስተዳድሩ “ጳጉሜን ለኢትዮጵያ” በሚለው ሀገራዊ ንቅናቄ ከክልሉ ከፍተኛ የሥራ ኃላፊዎችና ባለሙያዎች ጋር ውይይት አድርገዋል፡፡

በውይይቱ ርእሰ መስተዳድሩ÷ በወርኃ ጳጉሜ ክልሉ አሁን ያለበትን ወቅታዊ ሁኔታ ታሳቢ ያደረጉ በርካታ ሥራዎችን መስራት እንደሚገባ አሳስበዋል፡፡

ገንቢ መልእክቶችን ለሕዝብ በማድረስ በክልሉ ያለውን አሉታዊ ድባብ መቀየር የሚያስችል የሥነ ተግባቦት ሥራ ማስራት ያስፈልጋል ብለዋል፡፡

“ጳጉሜን ለኢትዮጵያ ሀገራዊ ንቅናቄ” ፋይዳው ትልቅ መሆኑን ያነሱት ርዕሰ መስተዳደሩ÷ በንቅናቄው የክልሉ ሕዝብ ሰላሙ እንዲረጋገጥ፣ የልማት፣ የመልካም አስተዳደርና የኢኮኖሚ ጥያቄዎች እንዲመለሱ መስራት ይገባል ብለዋል፡፡

በክልሉ ያሉ መሪዎች ሕዝቡ አሁን ካለበት ስሜት ወጥቶ ተስፋ እንዲታየው እና አወንታዊ አስተሳሰብ እንዲመጣ ማድረግ  እንደሚገባቸው አስረድተዋል፡፡

በንቅናቄው የሚሰሩ የሥነ ተግባቦት ሥራዎች ከሌሎች ማኅበረሰቦች ጋር የሚያስተሳስሩ መሆን እንዳለባቸው ገልጸው፤ በሀገራዊ ተቋማት ላይ የሚሰጡ ያልተገቡ ውንጀላዎችን ማስተካከል ይገባል ብለዋል፡፡

በተለይም የጸጥታ ተቋማትን ስም ማጠልሸት እና ያልተገባ ስያሜ መስጠት አስፈላጊ ባለመሆኑ የተዛቡ አካሄዶችን በሥነ ተግባቦት ሥራዎች ማስተካለል እንደሚገባም ገልጸዋል፡፡

በሀገሪቱ አሁን ላይ ያለው ችግር የትርክት ውጤት መሆኑን ያነሱት ርእሰ መስተዳድሩ÷ ሀሰተኛ ትርክቶችን የመቀልበስ ሥራ ሁልጊዜም መሥራት ይገባል ማለታቸውን አሚኮ ዘግቧል፡፡

You might also like

Leave A Reply

Your email address will not be published.